Inrinni zan khan Bundesliga match-ah Borussia Dortmund leh Bayern Munich te chu 1-1 in an inhnehtawk a, he match-ah hian Harry Kane chu hliam avangin lak chhuah a ni.

First half darkar chanve an khelh tlin hma hretin J. Gittens chuan Dortmund tan goal a khung a, he goal hi second half hun tawp dawn minute 5 a la awmin Musiala chuan Bayern Munich tan a rul.

First half darkar chanve an khel tling vel chiah tihin Kane chu a kerek a tihliam palh a, Thomas Muller chuan rawn thlakin, ani hian goal a khung teuh hle nghe nghe.

Kane-a hliam dan chungchangah Bayern Munich boss Vincent Kompany chuan rei a chawlh a rin loh thu a sawi.

England tana goal khung hnem ber Kane hian tun season Bundesliga game 12-ah a la inlan vek a, thawhlehni hian German cup last 16-ah Leverkusen an hmachhawn dawn, hetah hian Kane hi a inlan theih a rinawm loh.

"Harry chuan a hliam chu na tak a nih loh thu a sawi a, mahse uluk takin kan endik sak dawn a ni.

"Thawhlehniah erawh a inlan hman ka ring lo, ni hnih khat lek chhunga player dam hman hi ka hre ngai lo a ni.

"Kan goal khung khawl Harry Kane thlak hi a har dawn hle, mahse squad kan nei tha a, tha taka khel turin rinna ka nei a ni," tiin Kompany chuan a sawi.

Kane hian tun season Bundesliga game 12 atangin goal leh assist vawi 19 a nei tawh a, ani aia Bundesliga-a goals+assists nei tam tun season-ah an awm lo a ni.