Bayern Munich striker Harry Kane chuan Inrinni zan khan hat-trick siamin a thiante tih goal tur vawi hnih a siamsak a, an khelmualah si sarih faiin Bochum an sawp.

Allianz Arena-a inkhelah hian Eric Maxim Choupo-Moting, Matthijs de Ligt, Leroy Sane leh Mathys Tel-te pawhin goal khat theuh an thawh a, Bundesliga season tharah tlawm nei loin an awmzui zel. An goal hmasa ber minute linaa Choupo-Moting tih luh a ni a, Kingley Coman siamsak niin hma an hruai hma hle.

Minute 12 an khel tling tihin Kane hun a thleng a, Bochum defender-te tihsual hmang tangkaiin an goal hnihna a khung. Darkar chanve an inkhelh hma hretin De Ligt chuan Joshua Kimmich siamsak a ti lut veleh a, Sane-in Kane ball pek tha tak goal-ah a chantir ve bawk.

Second half an tan atanga hunrei loteah Bochum centre-back Ivan Ordets a chesual a, an box chhungah a kutin ball a khawih. Referee chuan hei hi hamin penalty a chawi a, Kane lo dingchhuakin an goal lina a khung. Thomas Tuchel leh a naute hian an la duhtawk lo tih lantirin huntawp dawn hnaihah goal dang an nei leh a, Kane leh Tel-te tih luh niin point thum an hlawhchhuak chiang hle.

Goal thum khungtu Kane hian a in zirchhuahna Tottenham chhuahsan mahse, a thiamna ala theihnghilh lova, Germany-ah a thiam thil a pholang chhunzawm zel. Nilaini zan khan Champions League group stage-ah 4-3 in Manchester United an hneh a, goal khat khungin midang tih goal tur vawi khat a siamsak bawk.

Bundesliga-a a game hmasa pangaah goal sarih a nei ta a, Inrinni zana inkhel hi 2017 Pawltlak thla hnua league-a hat-trick a siam lehna hmasa ber a ni. Bayern hian Bundesliga season thara game nga an khelhah tlawm an la nei lova, an tumpuite vawi li hnehin inhnehtawk result vawi khat an nei.

Bochum lakah hian 61% ball an chang a, shot vawi 26 zet neiin, goal zawnah vawi 15 an pet bawk. Football dan pangngaiah Kane hian hat-trick siam mahse, German football danah hat-trick a ni ve miah lova, a chhan chu dan hran an neih vang a ni.

A goal hmasa ber leh a dawttu inkarah midangin an ti goal ve a, a goal hnihna leh goal thumna inkarah midang tih luh a awm bawk. Hetianga goal thum khung hi Germany-ah hat-trick tiin an sawi ngai lova, chhiar dan hran an neih avangin sawisel ngawt theih a nilo.

Hat-trick a an pawm theih chu first half emaw second half emawa goal thum khung thei anni a, first half-ah goal khat khungin, second half-ah goal hnih khung leh pawh nise an pawm thei chuang lo. Hat-trick siam tur chuan goal dang inrawlh hmain vawi thum an ti lut tur a ni a, a karah an pawl atanga lo khung ve an awm anih chuan hat-trick-ah an pawm thei lo.

Hetiang chiah hi Erling Haaland pawhin a tawng tawh a, Borussia Dortmund tana a game hmasa berah goal thum thun mahse, German football danah hat-trick a nilo. A goal khung kar lakah Jadon Sancho vawi hnih a inrawlh a, hat-trick angin pawmsak lo mahse khawvela hmuhah hat-trick a ni tho.

Hemi chungchang hi sawiin German football expert Raphael Honigstein chuan, "Kan ramah hian chhan engemaw avangin hat-trick a pawm theihloh kan nei. Hat-trick siam tur chuan a karah midang goal a awm ve a rem lova, first half emaw second half emawa an khung vek a ngai bawk. Haaland khan a ngai pawimawh hran lo tih lantirin ball a la a, dah that atan tiin chan loh a hlau hle." tiin BBC Radio 5 Live-ah a sawi.

Kane pawhin dan hran awm hi a ngai thutak lem lova, inkhel zawh hnuah ball nena an lan dunna thlalak a tarlang. Kum 30 mi hi Jamal Musiala leh Thomas Muller-te nen an in man khawp mai a, an inkawp fuh dawn niin a lang. Musiala hi thiamna nei tha leh player thawkrim tak tiin a fak a, Muller pawh player fing leh thiante tana mi tangkai tiin a dahsang viau a ni.