Kan tlak chhan eng nge? -  Gundogan

02nd December 2022, 02:12PM

Football ram lian, World Cup-ah pawh vawi 4 champion thei Germany chu a zawnin Group Stage an paltlang zo ta lo.

Group E-ah awmin an match hmasa berah Japan an hneh lo, Spain nen an inhnehtawk a, an match hnuhnung berah Costa Rica hneh mah se an group-ah pathumna an ni a, an tla ta.

Group E match hnuhung ber a hmuhnawm kher mai, inkhelh chhung zawngin Group Table a inthlak danglam, a chung ber atanga a mawng ber thlengin an inthlak kual zak zak.

A tawpah chuan Japan-in 2-1 in Spain an hneh khauh a, 4-2 in Costa Rica hneh mah se Germany tan a tawk zo ta lo a ni.

2022 Qatar World Cup atanga an tlak hnuin Manchester City player Ilkay Gundogan chuan, "Goal kan chhuah ho thei lutuk a, ball kan hloh awlsam em em bawk. Tin, kan hmatawng ten goal khungna chance tha awmze nei lovah an chhuah fo bawk.

"Hmachhawp leh duhthusam chi hrang hrang kan nei, kan inenfiah a ngai a ni.

"Player mal leh a team ang pawhin kan that dan berin kan inlan lo, kan tlak chhan hi eng nge ni ta ang? Tih kan inzawh a ngai.

"Darthlalangah inenin, 'Kan tha thawh kha a tawk zo lo a ni,' tih mahni leh mahni kan inhrilh a ngai a ni," tiin a sawi.

World Cup hnuhnung zawkah khan hmui hup lo mah se Group Stage an lo paltlang zo tawh lo bawk a nih kha, Euro hnuhnung berah pawh last 16 an paltlang zo lo bawk a, kumin World Cup-a hetia an han tla leh ta hi Kimmich chuan hrehawm a ti fal.

"Mimal takin hrehawm ka ti fal, hei hi ka football career-a hrehawm ka la tih ber a la ni hial maithei a ni.

"World Cup round of 16 a zawnin ka lut ta lo, Euro-ah pawh khan hma takah kan tla bawk.

"Hun liamta ka thlir kir a, hun tha tak tak kan bawhpelh hi tawrh thiam a har ka ti a ni," tiin Kimmich chuan a sawi ve bawk.

 

 

Copyright © inkhel.com 2024. All rights reserved.