Bruno Fernandes chuan Manchester United-a a khelhpui te chu an thatchhiat thu a sawi chhuak a, an squad chhunga player te chu inel turin a duh tih thu Everton nen an inhmachhawn zawhin a sawi bawk.
United hian United States lamah Pre-season tour an hmang a, Premier League Summer Series-ah game thum khelin, an match hnuhnung berah Everton nen 2-2 in an inhnehtawk.
"US-a tour kan nei hi tha ka ti hle, player te kan inman chhoh phah dawn a ni. Chutih laiin Everton kan hmachhawn tum khan kan thatchhe hle a, he kan rilru puthmang hi kan thlak a ngai.
"Tu nge thatchhia tih sawi ka tum lo, kan club hian team tha tak din tumin sum lamah pawh theihtawp a chhuah tih hi kan hre reng tur a ni.
"Player thatchhe ho sawi ka tum lo a, kan mamawh ber zawk chu, kan squad chhungah hian inelna boruak tha tak awm thei se ka duh a ni. Player thiamna leh theihna sang bik kan lak luh te pawh a ngai, inkhelh bul tan tuma inchuh rap rap te pawh kan mamawh a ni.
"Player thar lak luh chungchang hi chu manager leh club buaipui tur a ni a, tun nipui bazarah hian player pahnih khat chu la lut leh ila ka duh ngawt mai," tiin Bruno Fernandes chuan a sawi.
Head Coach Ruben Amorim pawhin transfer bazar chungchang a sawi a, player thar la lut turin hma an lak mek thu a sawi chhuak.
"Team tichak turin theihtawp kan chhuah mek a, kan tana tha tur player kan la dap reng a ni. Chutih laiin bazar suk thleka zir hi a ni ve a, kan la hre chho zel ang chu, tun dinhmunah erawh ka hlim tawk hle bawk a ni," tiin Amorim chuan a sawi.
Tun nipui bazarah hian Manchester United hian player 3 an la lut tawh a, Wolves atangin Matheus Cunha an la a, Brentford atangin Bryan Mbeumo an la a, Cerro Porteno atangin left-back Diego Leon an la tawh bawk.
RB Leipzig striker Benjamin Sesko chu lak tumin hma an la ve mek nia report a ni a, kum 22 mi Slovenian striker hi Newcastle United pawhin an duh a, €80million-in bid an thehlut a, hei hi Leipzig chuan an lo hnar a nih kha.
United States lama Manchester United tour chu a zo fel ta a, Premier League Summer Series-ah hian 2-1 in West Ham an hneh a, 4-1 in Bournemouth an hneh leh a, an match hnuhnung berah 2-2 in Everton an inhnehtawkpui a, team pathum zinga point hmu sang ber niin, trophy an chawi a ni.