Real Madrid chuan tun season La Liga game 3 an khelh atangin vawi khat chiah hnehna an chang a, vawi hnih an khingpui an inhnehtawkpui.

Nizan khan Las Palmas nen 1-1 in an inhnehtawk a, Moleiro goal chu second half-ah Vinicius chuan penalty hmangin a rul.

Point 9 hlawhchhuah theihna atangin Real Madrid chuan point 5 chiah an hlawhchhuak.

"First half kha kan khel chhe hle, kha vang khan harsatna lian tak kan tawk tih a lang. Kan team that rual dan hi a inbuktawk chiah lo, ball kan inpe kual rang tawk lo a, ball kan hlohin kan chang let vat thei lo bawk.

"Kan harsatna hi chinfel vat dan kan ngaihtuah a ngai a, rang taka kan chinfel vat theih ka ring a ni," tiin Real Madrid boss Carlo Ancelotti chuan a sawi.

Moleiro chuan tan atanga minute 5-na lekah Las Palmas tan goal a khung a, Sandro chuan si hnih faiin Las Palmas lam hma a hruaipui teuh hle bawk.

Second half minute 67-ah handball avangin Real Madrid chuan penalty an hlawhchhuak a, he penalty hi Vinicius Jr chuan goal-ah a chantir a, 1-1 in an inhnehtawk ta a ni.

PSG atanga Real Madrid pan Kylian Mbappe chuan La Liga-ah goal a la khung lo a, Los Blancos hian Endrick leh Mbappe neih belh mah se, goal khung lamah harsatna an tawk rih mek.

An team a inbuktawk lo ti chungin Ancelotti hian player thar lak belh an tum tawh loh thu a sawi chiang bawk a ni. Madrid hian tun Pathianni hian Real Betis an hmachhawn leh ang.