Nilaini zan khan Old Trafford-ah Manchester United chuan Chelsea an mikhual a, mual neitu lamin 2-1 in hnehna an chang.

Antony chuan penalty hlawhchhuak mah se, captain Bruno Fernandes chuan goal-ah a chantir thei lo. United tan McTominay chuan goal hnih a khung a, minute 19-ah box chhung atangin a volley goal a.

He goal hi first half tawp hma hretin Palmer chuan mawi lutukin bottom corner-ah chhuih goal-in a rul. Second half minute 69-ah Alejandro Garnacho-a cross chu McTominay chuan tauh goal lehin, he goal hi an chakpui ta a ni.

Inkhelh zawhah United boss Erik ten Hag chuan, "Kan talbuai lem lo tih a lang chiang e. Hahdam takin kan khel a, team thar kan dinna kawngah theihtawpin hma kan la ho chho mek bawk a ni.

"Kawng dik kan zawh chho mek, pawn lam atanga sawiselna hian min tibuai lem lo. A hma aia tha zawka khelh zel kan tum a, kan chet chhiat chuan, kawng dik zawh tumin hma kan la leh zel bawk.

"Season hi a rei a, hma nasa taka kan sawn a ngai team hlawhtling nih kan tum a nih chuan. Tin, he team hian hmasawn theihna nasa tak a nei a ni tih a lang a ni," tiin a sawi.

Chelsea an mikhual tum hian United an khel tha hle, shots vawi 28 lai an nei a, an khingpui team lam erawhin vawi 13 an nei. Shots on target hi United-in vawi 9 an nei a, Chelsea lamin vawi 3 an nei.

Newcastle United an hmachhawn tumin an khel nawi hle, mahse Ten Hag chuan player thatchhia pahnih Rashford leh Martial te a start tir lo a, United hmatawng te an tlan tamin chance hlauhawm an siam hnem hle.

Goal khung tuma an nawrna lamah Chelsea lam pawhin United tlarhnungah hmun thawl an hmu thin a, goal khungna hun tha tak tak an bawhpelh nawk bawk.

Manchester United chu teable-ah 6-na an ni mek a, top 4-a awm Manchester City chu point 3-in an phak lo mek. Khelh 15 atangin United hian point 27 an nei a, hmahruaitu Arsenal chu point 9-in an phak lo mek a ni.