Manchester United manager Erik ten Hag chuan an forward chhuah tum anga sawi, Cristiano Ronaldo chu hralh an tum loh thu leh, an ruahmannaa a tel thu a sawi.

United hi Thailand-ah pre-season tour neiin an awm mek a, he tour-ah hian Ronaldo a tel ve loa, Ronaldo hian chhungkaw thil chhuanlamin pre-season tour a tel ve loh a dil a, United hian an phalsak.

Chanchinbu mi te chuan kum 37 mi Ronaldo hian chhuah a dil thu an tarlang nasa hle a, chanchinbu thenkhat chuan United pawh hian an striker hi a phu tawka dawrtu an awm chuan lo bengkhawn an tum tih an tarlang bawk.

Ten Hag chuan, “Kan hnena Cristiano Ronaldo awm loh chhan hi a mimal thil a ni a, season lo awm turah hian kan ruahmannaah a tel a, chu bak a awm lo. Thawhpui hun ka ngakhlel a, Cristiano hi hralh kan tum lo. Kan ruahmannaah a tel a, a hova hlawhtlin kan duh. Tour-a ka chhuah hma khan Cristiano nen kan inbia a, kan inbiakna pawh a tluang em em a, a chhuah duh thu a sawi lo,” tiin Ronaldo chungchang a sawi.

Thawhlehni hian Thailand-ah United leh Liverpool te chuan friendly match an khel dawn a, pre match press conference-ah Ten Hag hian Harry Maguire chu an captain a nih chhunzawm tur thu a sawi bawk.

“Harry Maguire hi kan captain a ni zel dawn a, kum khat aia tam he club captain a lo ni tawh a, a hlawhtling em em a, hemi chungchangah hian buaina ka nei lo,” tiin Ten Hag chuan Maguire-a chungchang a sawi a ni.