Nizan Europa League match-ah Manchester United chuan FC Porto an tlawh a, team hnih te 3-3 in an inhnehtawk.

Minute 20 chhung lekin United chuan goal hnih an khung a, si hnih faiin hma an hruai. Rashford chuan mawi lutukin mual veilam sir atanga la lutin a chhuih goal.

Rashford hian Hojlund-a pet goal tur a siam sak bawk. First half chhungin Porto chuan Pepe leh Omorondion hmangin an siphurh an rul leh hman.

Second half tir lamah Omorodion chuan Porto hma a hruaipui leh a, hun tawp dawn lamah Bruno Fernandes hnawhchhuah a ni bawk. Kim lo chungin khel mah se, Harry Maguire chuan hun tawp dawn tak takah United siphurh a rul a, 3-3 in an inhnehtawk ta a ni.

Tun hnai Erik ten Hag a chefuh hleithei lo, Palance nen goal awm loin an inhnehtawk a, FC Twente nen 1-1 in an inhnehtawk a, Tottenham lakah si thum faiin an tlawm. Porto an inhnehtawkpui leh bawk. Game hnuhnung 4-ah chak an nei lo a, vawi 3 draw neiin, vawi khat an tlawm.

Tun Pathianni hian Champions League-a Bayern Munich hnehtu Aston Villa an luhkhung dawn a, heta an chak lo leh a nih phei chuan Erik ten Hag-a dinhmun a derthawn tawh hle dawn niin media te chuan an ngai. 

A dinhmun a tha vak lo nia a lan laiin Erik ten Hag chuan, "Kan tum ram chu kan thleng dawn tho. Tun dinhmunah min la teh suh u, season tawpah min teh zawk dawn nia.

"Team indinthar mek kan ni a, hmasawn zel tur kan ni. Season hnih hetah ka awm tawh a, final vawi hnih kan lut ve ve bawk, title lak tumin kan bei chhunzawm zel ang.

"Player leh staff te inkar a tha a, player te pawh an inlungrual. Kan rilru puthmang a dik a, trophy hlawhchhuah an chak em em a ni," tiin a sawi.