Nilaini zan khan tun season Europa League-a an game hmasa berah Manchester United chuan Twente an mikhual a, team hnih te 1-1 in an inhnehtawk.

First half minute 35-ah box veilam sir atangin kawh lutukin Eriksen chuan goal a khung. Second half minute 68-ah Eriksen-a ball hloh chu Lammers chuan changin, box chhung a thlenpui hnuah near post atangin a chhuih goal.

Twente hi Erik ten Hag-a football coaching career bul ṭanna a ni a, player a nih laiin FC Twente tan hian game 234 lai a khel hman bawk. United boss chuan an ngaih a ṭhat hma lutuk avanga chak zo lo an nih thu a sawichhuak.

"Anni tan chuan game hlu tak a ni a, chuvang chuan an theihna zawng zawng an chhuah. Keini erawh kan theihna zawng zawngin kan khel lo a, kha kha a ṭha lo hle a ni.

"A tir lamah goal khung nual ila, beisei tur nei tawh loin kan siam thei. Goal khat kan khung khan, goal dang khung leh tumin kan bei tur a ni.

"Goal khung lamah kan themthiam a ngai. Goal kan khung theih loh chhuanlam erawh ka siam dawn lo, hei hi zanina kan harsatna tawh pawh a ni ber lo.

"Kan game dang zawngah kan thawkrim a, kan rilru puthmang pawh a dik ṭhin. Zanin erawh kan taima tawk lo kha ka sawiselna a ni," tiin United boss Erik ten Hag chuan a sawi.

United hi league-ah 11-na an ni mek a, tun Pathianni zan hian Tottenham an hmachhawn ang a, kar leh Ningani zan Europa League match-ah Porto an hmachhawn leh ang.