Arsenal boss Mikel Arteta chuan an player lak tharte avanga a hlim thu a sawi rualin, tun nipui bazarah hian an la bazar zawh loh thu a sawi tel bawk.

Arsenal hian Singapore lamah pre-season tour  an nei mek a, Milan leh Newcastle United te nen an intum dawn. He an pre-season tour-ah hian an player lak thar Martin Zubimendi, Christian Norgaard leh Kepa Arrizabalaga te chu an hruai a, Club World Cup khel zo hlim Noni Madueke erawh an hruai tel ve lo thung.

"Hmel thar an rawn lang a, anni hian phurna nasa tak team-ah a rawn thlen a, thahrui thar an rawn luhpui bawk. Kan mamawh player kan la lut a, club chhunga tu pawh hian a hma aia sang kan thlen theih kan inring vek a ni.

"Transfer window hi a la rei deuh dawn a, player thar dang te pawh kan la dap zel dawn. Hetih lai hian kan bazar zau vak tawh dawn lo, pahnih khat bak kan melh tawh lo, kan squad tichak thei tur kan zawng leh mek a ni.

"Bazarah kan la hawi kual zel a, chutih rual chuan tuna kan neih sa player te hi kan ngaihtuah ber a, pre-season min hmanpui thei se tih chu kan duhthusam ber a ni a, tuna kan lei tawh te nen pre-season kan hmang ho thei tur hi a lawmawm a, hna tha tak kan thawk a ni.

"Club neituten theihtawp an chhuah a, ka lawm em em. Club sporting director Andrea hian hna tha tak a thawk niin ka hria, kawng engkimah theihtawpin hma a la a ni. Transfer window a la inhawng reng dawn a, kan team tichak theitu tur kan la dap zel a ni," tiin Mikel Arteta chuan a sawi.

Arsenal leh Sweden international Viktor Gyokeres te chu sawi zawm an ni mek a, kum 21 mi Valencia defender Cristhian Mosquera pawh Arsenal hian an ngaihven mek nia report a ni.

Gyokeres chungchang an zawh chuan Mikel Arteta chuan, "Club dang player chungchang ka sawi thei lo. Kan team chungchang chiah ka sawi thei. Thil chiang tak a awm hunah erawh kan rawn sawi vat dawn nia," tiin a chhang bawk.