Manchester United captain Bruno Fernandes chuan, goal an khung tam loh chungchangah mawh a phur niin a inngai a, a rang thei ang bera goal khung chho leh tura beih a tum thu a sawi bawk.

Kum 30 mi United midfielder hian club tan a game hnuhnung 15-ah goal a khung tawh lo. Nations League-a Poland an hmachhawn hmain Bruno chu United chungchang zawh a ni a, hetah hian club chetchhiat chhanah amah pawhin mawh a phur thu a sawi.

"Club chungchangah chuan, hma sawn vat vat a, ka that dan ngai anga khelh leh vat vat ka tum, goal tam zawk khung leh ka tum mek a ni.

"Goal kan khung hleitheih lohnaah hian mawhphurtu pakhat niin ka inngai bawk a, a chhan chu midfielder goal khung thei tak ka ni thin a, khatiang ang kha nih leh ka tum a, keimahah hian beisei pawh a sang bawk a ni," tiin Bruno Fernandes chuan a sawi.

Tun season zet chu Manchester United hian league lamah goal an khung hleithei lo. Premier League game 7 an khelh tawh atangin goal 5 chiah an la khung a, anni aia goal khung tlem chu Southampton chiah an ni.

"Keimah hian ka nih dan tur ang hi ramri ka kham ve hrim hrim a, tun lai chu goal ka khung hleithei bik lo. Goal khung chhoh leh vat vat ka inbeisei a ni. Goal khung leh a, ka team chak chhohpui leh ka duh a ni," tiin Bruno chuan a sawi bawk.

Kum 2020 khan Fernandes hian United a zawm a, game 244 atangin goal 79 a khung tawh bakah, assist vawi 70 a nei tawh bawk. Tunlai United an talbuai hle a, Premier League table-ah 14-na an ni mek. October ni 19 hian league match an khel chho leh tan dawn a, hetah hian Brentford an hmachhawn dawn a ni.