FA Cup third round-a Manchester United an hneh loh danah, Mikel Arteta chuan chak phu zawk niin a inngai a, goal an khung theih loh avanga an tawrh thu a sawi bawk.

Emirates Stadium-ah ngei hun rei tak kim loa khel United an hneh zo lo. Arsenal hian na takin nawr mah se goal an khung thei lo a, 1-1 a an inhnehtawk hnuin penalty shootout-ah mikhual team an chak ta zawk a ni.

"Kan chak lo kha a mak hle a ni, chu chu ka sawifiah thiam dan ber a ni. Inkhelh kan thunun a, engkimah kan chungnung zawk a, chak tumin theihtawp pawh kan chhuah bawk.

"Goal khat chiah kan khung, chance tam tak kan neih leh penalty chance kan neih te kan hmang tangkai lo. Lungngai takin kan haw, mahse ka player te erawh ka chhuang em em a ni," tiin Mikel Arteta chuan a sawi.

Gabriel Jesus chu Bruno Fernandes a khak fuh palhna lamah a khup a hliam palh, first half tawp hma hreta lak chhuah a ni a, Sterling chuan a thlak.

Kum 27 mi Jesus hi zawn chhuah a ni a, a hliam hi a nat hmel hle niin Arteta chuan a sawi.

"Jesus chungchang hian mi tilungngai a ni. A khup a dawm a, na a tih hmel em em.

"A ngaihthatthlak loh, kum 2022-a a inhliam ang deuh kha a ni leh ang tih ka hlau hle a ni," tiin Mikel Arteta chuan a sawi bawk.

Arsenal hian player inhliam an nei nual a, Bukayo Saka chu hamstring hliam avangin zai a ni a, March thla emaw velah a rawn kir theih chauh a rinawm.

Ethan Nwaneri  pawh Brighton an hmachhawn tumin a inhliam a, Riccardo Calafiori, Takehiro Tomiyasu leh Ben White te pawh an la chhawr theih loh bawk.