Real Madrid chu Champions League atangin an tla fel ta a, mualphothlak takin Ajax chuan Real rorelna an tihtawp sak.

Santiago Bernabeu-ah Real chu 1-4 laiin an tlawm a, first leg-ah chak zawk mahse, second leg-ah team te zawk Ajax-in an lehthal chiang hle. Real Madrid defence a pawpa, Ajax an chai hleithei lo a ni ber.

Real Madrid tan captain Sergio Ramos awm loh a lang a tih loh theih lova, Ramos awm se chu an tlawm a nih pawhin goal li em chu an chhuah a rinawm loh. First leg-ah pawh Real hi an chak hram tawh a, hemi tum hian Ramos a khel tha hle. First leg-ah Ramos hian red-card a hmuh avangin second leg a khel thei lova, UEFA lam chuan a red card hmuh dan chhui chiangin, Ramos hian card a hmu lui ngeia an hriat avangin an hrem zui nghe nghe.

Real Madrid manager Santiago Solari chuan Champions League atanga an tlak zawhin an captain an ngaih thu a sawi a, “Player dangte ka sawiselna ni lovin, kan captain kan ngai vawng vawng,” a ti.

Ramos hian quarter final a khelh theih nana card hmu lui nia puhna chu a pha a, UEFA erawhin an pawm lo. Quarter final khelh duh avanga card hmu lui a nih chuan Ramos hian a ti fuh lo hle a ni.

Sawi zelin Solari chuan,”Season khirh tak kan hmang meka, mahse hun harsa ah pawh kan hnual dawn lo tih lantir kan duh. Hun awlsamte chu mi zawng zawng tan thil nuam a ni a, paltlang an awl. Mahse hetiang ang hun harsa ah erawh kan huaisen a ngai a ni,” a ti.

Real Madrid hi a zawnin Champions League-ah vawithum champion zawn mek mahse, nikum khan manager Zinedine Zidane leh an thiampuipa Cristiano Ronaldo-te chu an chhuak a, hemi hnu hian ngai an awh leh thei tawh lo a ni.