Ka tihsual kha kan chakna hnar a ni - Messi

01st December 2022, 02:12PM

Kumin World Cup-a an match hmasa berah Saudi Arabia lakah an tlawm, Argentina hian knock out stage an lut dawn em? Tih sawi chian a har hle.

An khelh hmabak pahnihah chak turin an inbuatsaih, Mexico an hmachhawn a, si hnih faiin an hneh a, nilaini zan khan Poland hmachhawn lehin si hnih fai bawkin an hneh leh.

Group winner niin chiang takin round of 16 an lut ta, Argentina rawn comeback a ropui khawp mai. Poland an hmachhawn tum hian Lionel Messi chuan penalty a pet goal lo hlauh, mahse Allister leh Alvarez ten goal an khung ta tho a ni.

Group winner an nih avangin Group D-a pahnihna Australia chu Round of 16-ah an hmachhawn ang.

Inkhelh zawhah Argentina captain Lionel Messi chuan, "Penalty ka hlah hnu khan ka thiante khan chak duhna thinlung puin theihtawp an chhuah zui ta a ni.

"Goal khat kan khung chuan game nasa takin a danglam chho dawn tih kan hria. Mexico kan hneh hnu khan kan rilru put hmang pawh nasa takin a inthlak bawk a.

"Mual chhunga kan luh chiah khan chak tumna rilru kan pu vek a ni. Australia kan hmachhawn dawn, game hautak em em a ni dawn.

"Kumin chu chak tur hi a hriat lawk loh, team tha nia hriat pawh an tlawm a, chuvang chuan kan tih thin angin kan theih tawp kan chhuah dawn a ni.

"Hahdam taka kan awm erawh a ngai, tunah chuan kan World Cup a intan dawn chiah e, vawiina kan chet angin result tha kan hlawhchhuah chhoh zel ka beisei," tiin a sawi.

Argentina defender Nicolas Otamendi chuan, "Dinhmun tha lo taka kan awm avang khan chakna kan neih phah a, vawiin pawh kan tan chuan final a ni a, chak loh hi kan tum lo reng reng a ni tawp mai," tiin inkhelh zawhah a sawi.

Saudi Arabia an hmachhawn tum khan an khel tha lo ve hle, an game plan ang pawhin an khel thei lo. Mexico an hmachhawn tum pawh khan Argentina game kan hmuh chak ang kha kan la hmu tak tak lo kan ti thei awm e.

Poland lakah erawh inkhel hmuhnawm tak min hlui a, Poland lamin defensive game an lo khel bawk nen, Argentina khan goal khung tumin an nawr ngar ngar. Goal hnih an khung khan an chak dawn tih chiang viau tawh mah se goal dang khung tumin an la nawr ngar ngar a nih kha. 

Han chesual zeuh pawh ni se an rawn tho leh a, knock out stage luh an phu tak zet a ni.

Copyright © inkhel.com 2024. All rights reserved.