Kum 7 chhung ngawt Real Madrid a pan dawn tih thuthang a awm hnuah, Kylian Mbappe chuan July ni 16 khan Real Madrid-ah contract a ziak a, Santiago Bernabeu-ah mipui 80,000 chuang hmaah pho chhuah a ni chhunzawm bawk.

Kum 25 mi hian June thla khan PSG chhuahsana, Real Madrid a pan tur thu a tichiang a, Santiago Bernabeu-ah lawmluhna hun hman a ni a, Jersey no. 9 hain, Real Madrid a pan chu a suangtuahna a taka thleng a nih thu a sawi hnuah club crest a fawp bawk a ni.

Mbappe chuan, "He hmuna ka lo awm thei hi a ropui ka ti tak zet, kum tam tak Real Madrid tana khelh chakin zanah ka suangtuah thin, vawiinah chuan ka suangtuahna a takin a thleng ta a, ka hlim tak zet zet.

"A hmasa berah chuan president Florentino Perez chungah lawmthu ka sawi duh a, kan intawh hmasak ber ni atang khan min ring tawk em em. Chutih laiin thil tam tak erawh a thleng, a chungah ka lawm em em a, Real Madrid ka pan theih nana thawktu zawng zawng chungah lawmthu ka sawi duh a, thil harsa tak ni mah se, hnehna kan chang ta e. Real Madrid player ka ni ta, ka chhungte pawh an hlim tih hmu a, ka nu phei chu a tap hial a ni.

"Ka tan chuan ni ropui tak a ni chiang e. Ka naupan lai atang tawhin Real Madrid tana khelh ka chak a, ka thil tawn hi ka tan chuan a va han hlu tak em. Madridistas te kum tam tak chhung min ngaina tih in lantir a, in chungah lawmthu ka sawi duh bawk. 

"Tunah chuan dream thar dang ka nei tawh. Khawvela club ropui ber tana khel tlaka ka nun a ngai a, he club leh crest tan hian ka nun ka hlan ang.

"Real Madrid player ka ni thei hi a hlu ka ti a, he hun hi rei tak ata ka lo nghah tawh a ni a, ka chhungte pawh an thaw huai mai. He hmunah hian tum neiin ka lo kal a, chona leh phurna nasa tak nen, champion tumin ka lo kal a ni," tiin a sawi.