Transfer deadline day-ah Manchester United chuan PSG atangin Manuel Ugarte an la lut a, kum 23 mi hian Old Trafford-ah kum 5 daih contract a ziak a, hetah hian thla 12-a pawhsei theihna ziah tel a ni bawk.

Uruguay international hi United chuan €50million (£42.3m; $55.8m) bakah add-ons €10m in an lei a ni.

"Khawvela ka club ngaihsan leh club lian em em ka zawm thei hi chhungrilah ka lawm veng veng. Club hmachawp te min hrilh a, an tum a sang a, kei pawh ka tum a sang bawk a, ka phur em em a ni.

"United hian supporter an nei tha em em a, Old Trafford-a United supporter te thawm ka chhim chak tawh tak zet a ni.

"Hlawhtlinna chan duh mi ka ni a, ka team te tan ka theihna zawng zawng ka hlan ang a, trophy hlawhchhuak turin kan bei ang a, club-in a thlen tum thleng turin kan bei dawn a ni," tiin Ugarte chuan a sawi.

United Sporting director Dan Ashworth chuan, "Manuel lak luh hi tun nipui bazar-a kan tum em em pakhat a ni a, khingpui te ball chhuhsak thei em em player a ni a, club leh ram tan record a nei tha em em bawk.

"A thiamna leh tawnhriat te hi kan midfield chuan kan chhawr tangkai dawn khawp mai. Manuel hi ngun taka kan lo thlithlai tawh a ni a, mual chhung leh pawna min puih dan tur hi kan dawn thiam nghal vek a ni," tiin a sawi bawk.

Ugarte hian nikum nipui bazarah khan Sporting atangin PSG a zawm a, Paris club tan game 37 a khel hman a ni. 

Manchester United hian tun nipui bazarah hian player 5  Leny Yoro, Matthijs de Ligt, Noussair Mazraoui, Joshua Zirkzee leh Manuel Ugarte te an la lut ta a ni.