Manchester United chuan Brentford aṭangin Bryan Mbeumo an la lut fel ta a, kum 25 mi hian Old Trafford-ah kum 2030 thleng atan kum 5 daih contract a ziak a, thla 12-a pawhsei theihna ziah tel a ni.
United hian Mbeumo manah hian £71million ($95.5m) vel an thehchhuak a, £65m chu vawi 4 rulh atan an hmang ang a, hetah hian bonus £6m a tel bawk a ni.
United leh Brentford te hi Mbeumo chungchangah hian an indawr rei hle, ni 40 chuang an indawr a, indawrna a tlawlh chho nual, Brentford lam hian Matheus Cunha man £62.5m an phut tlat. A tawpah chuan inremna an nei ta a ni.
Tottenham, Arsenal leh Newcastle United te pawhin Mbeumo hi an duh em em a, mahse a tawpah chuan Manchester United-in an chang ta nge nge a ni.
"Manchester United zawm theihna hun ṭha ka nei tih ka hriat khan, zawm ngei ka tum ruh hle. A chhan chu he club-a khelh ve hi ka suangtuahna a ni ṭhin a, an jersey hi ka naupan lai atanga ka hak ṭhin a ni nghe nghe.
"Rilru paukhauh tak ka nei a, nimin aia ṭha zawk nih hi ka tum ṭhin a ni. Sang taka invawrh zel duh mi ka ni a, head coach Ruben Amorim-a hnuaiah leh world-class player eng emaw zat kiangah nasa taka inzir ka tum a ni.
"He club-in a thil tum min han hrilh a, ka phur tak zet a ni. He club hi club ropui leh lian tak a ni a, stadium ropui leh fans ṭha em em an nei. Trophy lian lak tumna rilru pu an ni a, ka lawm em em," tiin Mbeumo chuan United a zawm hlimin a sawi.
United director of football Jason Wilcox chuan, "Premier League-a Bryan-a goal khung leh assist neih dan hi rin phak bak a ni. Englan ram chhunga khel zingah chuan player ngelnghet ber pakhat a ni.
"Kan thil tum te kan han hrilh a, Bryan pawh hian United team tichak theitu tur niin a inhria a, keini pawh kan lak tum em em kan la thei hi kan lawm hle bawk. US lamah pre-season a hmang ve ang a, Ruben-a hnuaiah a insiamrem vat ang a, season thar a nghahhlelhawm hle mai," tiin a sawi ve bawk.
Cameroon international hi tun nipui bazar inhawn laia Manchester United player lak thar pathumna a ni a, Wolves aṭangin Cunha an la a, Enzo Jana-Biyik an la bawk a, ani erawh kum 18 a nih avangin Swiss Super League club Lausanne-Sport lamah loan-a a chhuah leh nghal rin a ni.
United hian player hralh nual an tum a, Marcus Rashford pawh Pathianni khan Barcelona lamah a thlawk. Ani hian season khat chhung loan-in Catalan Club-ah hun a hmang dawn a ni.
Mbeumo hi kum 2019 khan Brentford chuan French club Troyes atangin an la a, Brentford tan game 242 khel tawhin, goal 70 a khung tawh bakah assist vawi 51 a nei tawh bawk a ni.
Mbeumo hi wing lamah a khel tam ta ber a, goal a khung thei phian nghe nghe. Position hrang hrangah a khel thei a, Ivan Toney nen khan striker angin an khel dun ṭhin nghe nghe. A khelh thiamna ber chu right wing a ni.
Mual sir aṭanga a lai lama ball lak luh a, cross emaw shot emaw hi a nuam tihzawng a ni a, Thomas Frank khan an chak dawn lo nia a hriat changin Mbeumo hi wing-back angin a kheltir ṭhin nghe nghe.