Nilaini zan khan North London Derby-ah Arsenal chuan 2-1 in Tottenham an hneh a, Arsenal hi table-ah pahnihna ni chho lehin, hmahruaitu Liverpool chu point 4-in an phak lo mek. Hetih lai hian Liverpool hi game khatin an khel tlem zawk.
Emirates Stadium-a inkhel hmuhnawm takah hian mikhual lamin goal an khung hmasa zawk a, minute 25-ah Son chuan box chhung chiah aṭangin bottom corner-ah mawi takin a volley goal.
Minute 40-ah Arsenal chuan an siphurh an rul a, corner aṭanga ball kal chu Gabriel chuan tauhin, hei hi Solanke chuan an lamah a dang goal a, first half tawp dawn tak takah box veilam sir aṭangin Trossard chuan mawi lutukin a chhuih goal bawk.
Inkhelh zawhah Arsenal boss Mikel Arteta chuan, "Ka naute ka chhuang a ni, darkar 72 chhungin match hahthlak tak pahnih kan khel a, ropui takin kan la khel chhuak thei a nia.
"Inkhelh a harsa a, mahse kan rilru put hmang erawh a dik a, kan nawr nain game ṭha leh ṭang tak kan khel a ni.
"Ni hnih khat danah game kan khel chho deuh mawlh mawlh mai. Vawiinah hnehna kan chang a, Aston Villa lamah rilru kan pe chho leh tawh dawn.
"Ni tin ka player te chet zia hi ka hmu a, inrintawkna nasa tak ka nei. Chutih laiin kan phu tawk result hlawhchhuah loh chang erawh kan nei ṭhin a ni," tiin a sawi.
Tun January transfer window inhawn laiin an bazar dawn em tih zawhna chu Arteta chuan, "Bazar dawn chiang e.
"Player pawimawh pahnih Gabi (Jesus) leh Bukayo (Saka) te kan chan a, transfer bazar-ah kan chhuak vak dawn. Kan player pawimawh pahnih kan chan avangin kan lak theih tur kan dap kual dawn a ni," tiin a sawi bawk.
Tottenham manager Ange Postecoglou chuan, "Kan khel ṭha tawk lo, a bik takin first half-ah khan kan che hleithei lo a ni.
"Arsenal kha inkhel kan thunun tir a, ball kan chang emaw chang lo emaw, kan khelh phung kha ka lawm lo a, kan khingpui te khan min thunun a ni.
"Kan nih dan angin kan lang chhuak lo, Arsenal hneh tur khan kan khel ṭha tawk lo a ni. Thil danglam rawn thleng thut tur a awm lem lo, kan thawhrim a, Sunday-a result ṭha kan hlawhchhuah leh nghal vat a ngai dawn a ni," tiin a sawi.