Ka hup vanga chak lo kan ni lo - Flick

24th November 2022, 02:11PM

Japan chuan  Group E match hmasa ber-ah Football ram ropui Germany an barakhaih, Gundogan-a penalty goal hmangin Germany-in hma hruai mah se, second half-ah Doan leh Asano ten Japan tan goal an khung, 2-1 in Blue Samurai an chak ta a nih kha.

Inkhelh tan hmaa team photo an lak laiin Germany team chuan an hmui an hup thap.  FIFA leh UEFA lamin 'One Love' armband hren an remtih loh avangin Germany team hian an ka hup sak an ni tih an lantir.

Germany-in first half-ah game an thunun, goal khungna chance pawh an nei nual, second half-ah erawh Japan an khel tha a, a tawp thlenga an tan avangin Germany an tlawm ta. 

Inkhelh zawha press conference an neih tumin reporter pakhatin ka an hup avanga chak lo an nih leh nih loh chungchang a zawhna chu Flick chuan, "Ni lo e, khatiang lam kha a ni lo, kan chak loh chungchangah erawh chhuanlam kan nei lo," tiin a chhang.

Chanchinbumi Mohammed Saeed Alkaabi chuan twitter-ah  Germany team ka hup lai thlalak post-in, "Football aia thil dang in ngaihtuah chuan hetiang hi a ni mai," tiin a ziak, like nuai 2 a kai rang hle nghe nghe.

German tana goal khungtu Gundogan chuan, "Goal bulah khan kan che tha tawk lo a ni. Ball kan vawrh nasa lutuk a, short pass kan neih lahin ball kan hloh nasa bawk.

"A chang kha chuan ball chan kan hreh ni tein a lang thin, ball kan hloh nasa lutuk kha a pawi a ni," tiin inkhelh zawhah a sawi.

Thomas Muller pawhin, "Min barakhaih chiang hle mai. Tun thlengin mak ka la ti, kan khelh dan en khan chak thei mai niin kan lang.

"Inkhelh kan thunun a, kan khel thain ka hria. Chutih lai chuan kan chance neih te kan hmang tangkai lo a, hetiang hi chuan chak a harsa thin a ni," tiin a sawi bawk.

 

Copyright © inkhel.com 2022. All rights reserved.