Ka hun tam tak ka khawhral: Dembele

22nd September 2022, 11:09AM

Barcelona leh France winger Ousmane Dembele chuan a hun tam tak a khawhral thu a sawi a, a nuna kum nga zet chu eng mah lova a chhuah thu a sawi bawk.

Borussia Dortmund-a a hming a chher hnuah, Dembele hian kum 2017 khan Barcelona a pan a, Barcelona hian a manah euro maktaduai 105 lai an seng.

Barcelona a zawm hnuah hliamin a tlakbuak nasat avangin Dembele hi a inkhel tam lo hle a, mahse tun season-ah erawh Barcelona player pawimawh ber zinga mi a ni chho a, a thatzia a lan tir leh mek.

Kum 25 mi Dembele chuan, “Kum 2017 atanga kum 2021 chhung khan ka hun tam tak ka khawhral a, ka nuna kum nga zet chu eng mah lovah ka chhuah. Ka inkhelh theih nan rim takin ka thawk a, zawi te te in ka khelh that leh theihna ka hriselna a titha.

“Hamstring injury vawi tam tak ka nei tawh a, ka trainer ten rim taka ka beih loh chuan ka injury a rawn kir tur thu min hrilh. Koeman-a hnuaiah khan hma ka sawn hret hret a, Xavi-a hnuaiah a aia nasa in hma ka sawn. Barca ka zawm khan ka la naupang hle a, ka pharvar ve bawk a, mahse mi te sawi ang em em erawh a ni lo,” tiin a sawi.

Copyright © inkhel.com 2022. All rights reserved.