Nizan Burnley leh Arsenal inkhel a chakna goal khungtu Arsenal defender Laurent Koscielny chuan a goal khungah a handball nge handball lo tih a hriat chian bik loh thu a sawi. Burnley leh Arsenal te an in hnehtawk mai dawn a a lan laiin injury time-ah Koscielny goal hmangin Arsenal an chak a, he goal hi chiang taka en chuan handball niin a lang.

Koscielny hi hanball mai bakah offside niin a lang a mahse referee in goal a a pawm miau avangin Arsenal an chak ta a ni. Koscielny chuan, "Ka handball nge handball lo ka hre lo. Ka ke dinglam khan pet ka tum a ka kuta ka khawih leh khawih loh erawh ka hre lo. Referee in goal-ah a a pawm a chuvang chuan referee thuthlukna hi kan zah mai tur a ni." tiin a sawi a.

Harsa a tih thu sawi chhunzawmin, "Game harsa tak a ni a. Kan theihtawpin bei a a tawpah kan duh ang kan hmu ta a ni. International break hmain chak ngei a kan hun khar kan duh a. Burnley kha an khel tha a theihtawp kan chhuah takzet kha a ngai a, rilru pe taka khelh reng kha a ngai bawk a ni. Football-ah chuan kan theihna zawng zawng hmanga chak zel hi kan tum ber a ni." tiin a sawi bawk.

Koscielny hi Arsenal tlarhnung tiphuisuitu ber a ni a tun season-ah a khel tha hle. Arsenal hian point thum hlu tak an hlawh avang hian pathumnaah an inhlangkai leh a, Liverpool nen point 16 ve ve hmuin goal difference-ah Liverpool ai hian an tha zawk a ni.