Juventus chuan an captain Danilo chu inhriatthiam tawnna hmanga an chhuahtir thu an tarlang a, hetih lai hian sawi neuh neuh a tam hle thung.

Brazil international hian Juventus-a a cham chhung kum 5 leh a chanve chhungin game 213 a khel a, tun season-ah pawh competition hrang hrangah game 16 khel tawhin, Serie A-ah vawi 6 inkhelh bul a ṭan.

December ni 29-a Fiorentina nen an inhnehtawk hnu khan matchday squad-ah telh a ni tawh lo a, Fiorentina an hmachhawn ṭum pawh khan substitute-ah awm mah se, chhawr a ni lo. Juve manager Thiago Motta chuan an captain chu chhuah a phalsak thu a lo sawi tawh bawk a nih kha.

Kum 33 mi hian Juventus tan trophy 4 a hlawhchhuak a, chung zingah chuan Serie A title telin, Leonardo Bonucci a chhuah hnuah 2023-24 season aṭang khan captain atan ruat a ni a, kum 60 hnua a vawi khat nan Juve khan Italian ni lo captain an nei a nih kha.

"Danilo hi a eizawnna kawnga mi entawn tlak leh mi inpe tak a ni a, a debut aṭanga a khelh tawp ni ber thlengin, black and white tan a theihtawp a chhuah a ni. A kal zelna turah duhsakna kan hlan," tiin Juventus chuan thuchhuah an siam.

Hetia an han inṭhaṭhen mai hi fans lam chuan mak an ti em em. Thiago Motta chuan a chhawr tam tawh lo, chumi hnuah free agent-in an chhuahtir ta tawl chu a ni. An captain an tih danah hian football fans tam tak an lungawi lo nia report a ni. Report ṭhenkhatin an tarlan dan chuan, Juventus-ah hmun a chang lo a, a lungawi lo. Hetih lai vek hian Juve pawhin player thar lak nan thehchhuah an lo duh bawk a ni awm e.

Danilo hi right-back, centre-back, left-back leh right midfield-ah a chhawr theih a, Brazil tan pawh game 65 a khel tawh bawk. A inkhelh chhung zawngin trophy 18 lai a chawi a, Manchester City-a a cham chhungin, 2017-18 leh 2018-19 khan a lo champion tawh bawk a ni.