British heavyweight boxer Anthony Joshua-a promoter Eddie Hearn chuan, Deontay Wilder leh Anthony Joshua te an inhnekna turin inremna a nei tawh tih a sawi.

Hearn hian pawisa chungchang leh thildangah te inremna nei vek tawh mah se, official contract erawh an la ziak lo tih a sawi a, Wilder te lam hian contract hi an ziah thuai loh chuan Joshua hi a inhnukdawk lovang tih a sawi thei lo tih Hearn hian a sawi tel bawk.

Hearn chuan, “Pawisa chungchangah leh thil dang engkimah inremna kan neihpui tawh a, tunah hian official contract chiah kan nghak tawh a, mahse kan nghak reng dawn bik lo,” tiin a sawi.

Joshua hian a zawna vawi hnih Oleksandr Usyk a hneh loh hnuah kumin chhungin fight pahnih a nei leh tawh a, Jermaine Franklin leh Robert Helenius te a hneh a, Wilder hi an inrempui theih chuan kumin December thlaah an inhnek a rinawm a, Saudi Arabia lama an inhnek a rinawm bawk.

“Joshua hian training pangngai a nei mek a, Wilder hmachhawn a duh. Kan puitlin thei ta lo a nih pawhin ring chhunga luh leh thuai a duh. December thlaah a inhnek leh a nih chuan thla riat chhungin vawi thum a inhnek dawn tihna a ni a, a pui khawp ang,” tiin Hearn chuan a sawi bawk a ni.

Wilder nena an inhnek thei ta lo a nih chuan, Joshua hian Tyson Fury a hmachhawn maithei niin Hearn hian a sawi a, a vawi thum nan Andy Ruiz nen pawh an inhnek leh maithei tih a sawi tel bawk a ni.