Anthony Joshua leh Oleksandr Usyk te chuan rematch an nei ngei dawn a, kumin May thlaah heavyweight boxer pahnih te hi a vawi hnih nan an inhnek dawn niin a lang.

Usyk leh Joshua te hi nikum September thla khan an inhnek a, hetah hian unanimous decision-in Usyk hi a chak a, WBA, IBF, WBO leh IBO heavyweight title te a hlawhchhuak.

Joshua hian a title hloh te hi neih kir leh ngei a tum hle a, Usyk nena an contract-a rematch clause awm chu Joshua hian tinung nghalin, a ni tur erawh tihfel a la ni lo.

Tyson Fury leh Usyk te hi an inhmachhawn theih nan Joshua hi a inhnukdawk dawn anga sawi tam mahse Joshua hian inhnuhdawh a tum lova, a title hloh te neih kir leh ngei a tum hle.

5 Live Boxing podcast-ah Joshua-a promoter Eddie Hearn chuan, “AJ hian Usyk a hmachhawn dawn a, buaina eng mah a awm tawh lova, kan duh dan tak a ni. He fight hi May thlaah in hmu ang,” tiin a sawi.

Nikum khan Joshua leh Usyk te hi Londoon-a Tottenham Hotspur Stadium-ah an inhnek a, Hearn hian an rematch pawh hi UK-a nghah leh ngei a duh thu a sawi.

Hearn chuan, “UK, America leh Middle East lam te a rem vek a, khawvel hmun hrang hrang atangin he fight thleng duh offer hi kan dawng a, keichuan UK hi ka duh a, mah se sawi lawk theih a la ni lo,” tiin a sawi belh bawk a ni.