WBC heavyweight champion Tyson Fury chuan, Anthony Joshua chu hun tha pe mah se, rei tak nghah a tum loh thu a sawi a, Thawhtanni thleng hun a pek thu a sawi bawk.
Fury hian boxing a chawlhsan thu puang zet mah se, a rawn kir leh tawh a, unified heavyweight champion lai Oleksandr Usyk nen kumin kum tawpa inhnek beisei viau mah se, Usyk hian nakkumah bak inhnek a tum tawh rih loh thu a sawi.
Nakkumah bak Usyk inhnek a tum tawh loh avangin, Fury hian a British pui Joshua chu kumin kum tawpa inhnekpui atan a sawm a, Joshua hian a pawm thu sawi tawh mah se, Joshua hian tun thlengin contract-ah a hming a la ziah hnan lo.
Joshua nena an inhnek tur chungchang zawhna chhangin, Fury chuan, “Thawhtanni hian kan hria ang, a chhan chu Thawhtannia kan la hriat loh chuan he kan fight tur hi ka kalsan ang. Kar thum liamta kha chuan kan inhnek ngei kha ka ring viau a, mahse contract ziak turin hetiang chen chen hun an mamawh turah ka ngai lo.
“A fight hnuhnunga panga-a vawi thum tlawm hi ka nghak reng dawn lova, title shot ka pe hi a vannei takzet. Keimah hian title shot pe lo ila chu, title shot nei leh tur chuan a nghah rei viau a ngai tawh ang.
“Hun tha pek hi ka pawi ti lova, mahse kan fight tur chungchang rawn thunun a tum tur a ni lo. Ka party-a ka mi sawm a ni a, ka dan hnuaiah a rawn intulut tur a ni. Inhnek a duh chuan kan chawhlui buatsaih a rawn kil mai tur a ni a, a nih loh chuan amah hian chawhlui hran buatsaih ve mai rawh se,” tiin a sawi.
“December thla ni 17-a Saudi Arabia-a inhnek turin Usyk hi contract kan zawrh a, undisputed heavyweight championship of the world atan a ni. Tu pawhin hemi ni hi an remti a, mahse Usyk hian a inhliam thu leh, nakkumah chauh a inhnek theih thu a sawi. Tunah erawh ka hlau angin a sawi leh tawh.
“He fight hi a hmaiah ka nawr chhuak ngei ngei dawn. December thla ni 3-a min hmachhawn tur ka zawng mek a, AJ hian a duh chuan a pawm thei a, a nih loh chuan midang ka hmachhawn ang. Tu pawh hi hlauin an tlanchhe vek a, tu pawh hi engtik hunah pawh, khawi hmunah pawh ka hmachhawn thei reng,” tiin Fury chuan a sawi belh bawk a ni.
