Khawvela entertainment wrestler zinga lar berte zinga mi John Cena chuan vawiinah hian kum 44 a tling chiah a, he mi pual hian a chanchin langsar zual thenkhat han thlir kual ila.
American professional wrestler bakah actor leh television presenter ni bawk John Felix Anthony Cena hi April 23, 1977 ah khan a piang a. West Newbury, Massachusetts chu a pian leh sei lenna niin, 1998 kumah khan bodybuilder nih a duh vangin California lamah a insawn a ni.
California lama a insawn atanga kum khatnaah professional wrestling lamah a lut a, 1999 kumah khan Ultimate Pro Wrestling (UPW) lamah a tel tan a. 2001 kumah khan World Wrestling Federation (WWF), tuna WWE ni ta chuan thuthlung an ziahpui a, a tirah hian Ohio Valley Wrestling (OVW) ah a inziak lut a ni.
WWF a luhchilh hnuah hian rapper tawng thei deuh angin a inlan thin a, hriat a hlawh chak em em mai a. 2004 kumah khan a vawi khatna atan singles title a la a, United States Championship-ah a chungnung ber a. 2005 kumah khan a vawi khatna atan WWE Championship title a la zui leh bawk a, he mi hnuah hi chuan a sang zawngin a lawn deuh char char a tih theih.
A lar chak bawk a, WWE vawrh lartu pawimawh tak a ni chho a. John Cena hi United States Champion vawi 5 ngawt a nih hman bakah world tag team champion pawh vawi 4 chu a ni hman a, world champion title vawi 16 ngawt a la tawh bawk a ni.
Cena hian WWE huanga world championship title lak hnem lamah record ding lai a nihrual a, Ric Flair nen record hi an chelh dun a. World championship title 16 a kawl zingah hian 13 chu WWE Championship niin, hei pawh hi record chu a ni hrim hrim bawk a ni.
Royal Rumble match-ah pawh vawi hnih chu a chak tawh a, Money in the Bank lamah pawh vawi khat chu a chak tawh bawk a. Hei bakah hian WWE pay-per-view event eng emaw zatah a tel tawh a, WrestleMania lamah pawh vawi 5 chu a inlan tawh a ni.
John Cena hian anime a ngaina hle a, anime film zingah chuan Fist of the North Star chu hmuhnawm a tih ber a ni a. Video games khelh pawh nuam a ti ve hle a, game hrang hrang zingah Command & Conquer ho chu khelh nuam a tih berte an ni.
Sport team duh deuh hlek a nei ve nual a, Boston Bruins, Boston Celtics, Boston Red Sox leh New England Patriots te chu American team zinga a duh zualte an ni a, Premier League club Tottenham Hotspur chu a duh viau bawk a ni.