Liverpool leh Fulham te an inhmachhawn tumin Liverpool defender Joel Matip chu a inhliam a, ACL Injury a nih avangin Matip chu tun season-ah a inkhel thei tawh dawn lo.

Sunday liamta khan Premier League inkhelah Liverpool hian Anfield-ah Fulham chu 4-3 in an hneh a, he inkhelah hian Matip hian inkhel bul tan mah se, a inhliam avangin 69mins-a lak chhuah a ni a, Ibrahim Konate-a’n a thlak.

Scan leh test hrang hrang tih hnuah Matip-a ACL a thler tih hmuh chhuah a ni a, zai a ngai dawn a, a tan tun season-a inkhelh leh hman ngaihna a awm tawh lova, a lo berah ACL zai ngaite hi thla 9 vel tal an chawl thin a ni.

Liverpool hian tunah hian centre-back pali chhawr theih Konate, Virgil van Dijk, Joe Gomez leh Jarell Quansah te an la kawl a, January thla-a thlasik bazar a inhawn hunah Merseyside club hian loan emaw tala centre-back lakluh tur an zawng maithei.

Tun season-a Liverpool in Premier League game 15 an khelh tawhah Matip hian vawi 9 inkhel bul a tan a, kum 32 mi hi a inkhelh theih tawh dawn rih loh avangin Van Dijk leh Konate te chu regular zawka an inkawp a rinawm a ni.