UFC strawweight champion hlui Jessica Andrade chuan MMA fighter dang pawhin an lo tih tawh chu ti vein OnlyFans lamah account a siam a. Jessica hi OnlyFans ah hian a lungawi hle a, leiba te pawh a rulh theih phah niin a sawi.
MMA fighter tam tak chuan nuamsa ve deuh hleka khawsa thei turin pawisa an hlawh chhuak tam lo hle a, hei vang hian tunlaiin OnlyFans lamah account an nei deuh nual tawh a. Insualnaa pawisa an hmuh piah lamah heti lam atang hian eng emaw zat an hmuh theih phah a, an tan chuan sum indaihlohna a chhawk zangkhai ve hle a ni.
Jessica Andrade pawh hian a kawppui Fernanda Gomes thurawn chu pawmin OnlyFans account hi a siam ve a, tlema saruak deuha thla a lak vel chu a pho lang a, pawisa lut chu a hmang tangkai ta a ni.
OnlyFans atanga a sum hmuh hmang hian a car man a bat te chu a pe tla vek a, chu mai piah lamah a in luah man pawh thla 7 chhung atan a pe tla thei bawk a. A fight neih hnuhnun bera a pawisa hlawh £138,000 pawh kha a la khawih chet loh phah niin Jessica chuan a sawi chhuak.
Kum 29 mi Jessica chuan, “OnlyFans hi ka tan chuan a tangkai viau mai a, ka pawisa hmuh hmangin ka car man bat te ka pe tla vek a. Chu mai a la ni lo a, in luah man pawh thla 7 chhung atan ka pe lawk nghal bawk a ni,” a ti.
“Ka fight hnuhnung bera ka pawisa hlawh chhuah pawh kha OnlyFans zarah ka la khawih che miah lo a. OnlyFans atanga ka pawisa hmuh hmang hian Brazil rama ka bill neih te ka pe thei a, chu bakah ka chhungte leh Fernanda chhungte pawh eng emaw zat ka pe ve bawk a ni,” a ti bawk.
A sawi zelnaah, “Thil tul hrang hrangah pawisa ka hmang teuh a, chu mi hnuah ka account ka en chiang a, a hmaa ka pawisa neih kha a lo la awm reng tih han hmuh khan a nuam duh reuh khawp mai a. Amazon velah thil ka lei teuh a, rin aiin pawisa a phai vak chuang si lo a, a tih chi tlat,” a ti.
“Tun hnaiah ka thlalak a put ru nual a, thil tha ber a nih loh rualin, hetiang thil hi thleng thei a ni tih ka pawm lawk vek avangin chuti vakin ka rilru a hah phah hran lo a. Kum 30 ka ni ve tawh dawn a, ka taksa hi a mawi reng thei dawn lo tih ka hria a, a mawi ve lai hi chuan pho lang deuh fo mah ila a pawi vakin ka hre lo,” tiin Andrade chuan a sawi.
“A nihna takah chuan a tirah mi chuan an ngaihven ve deuh ang a, vawi hnih khat an thlir ve ang a, a hnuah chuan thlalak ngai reng chu an en zui peih dawn chuang lo a. OnlyFans hi mi tam zawk chuan zahmawh huangah an ngai deuh a, chutiang chu a ni hauh lo a, kan ni tin nun te, kan thil tih chi hrang hrang pho lanna te a ni a. Tun dinhmunah chuan OnlyFans hi ka lungawipui khawp mai,” a ti.
Jessica Andrade (21-9) hian a fight hnuhnungah Valentina Shevchenko a hneh lo a, tun thlaa Sin City-a UFC 266 pay-per-view ah flyweight bruiser Cynthia Calvillo a hmachhawn hmel a ni.