Jude Bellingham chuan jersey number 22 a ha thin a, he number kher a thlan chhan hi sawi tur a awm ve tlat a ni.

Kum 17 mi Jude Bellingham hi Etihad Stadium-a Manchester City nen UEFA Champions League quarter final first leg an khelh tumin Borussia Dortmund tan a che tha hle a, chak zo ta lo mahse a thiamna chu a pho chhuak nasa hle.

A kum ngaihtuahin Bellingham hi khelmualah a puitling phian a. A chawr chhuahna Birmingham City tan game 44 chauh a khel hman a, Borussia Dortmund chuan £25 million in an la lut a, a chhuah hnuah hian Birmingham City chuan a number hak thin 22 chu an titawp zui daih a ni.

Borussia Dortmund a zawm hnuah number 22 chu a ha zui leh a, he number kher a thlan chhan chu Birmingham City tana a khelh laia thil thleng vang a ni a. A club hlui zawkah khan position pakhatah chauh inpumpek lo turin an hrilh thin a, No. 4 (holding midfielder) emaw, No. 8 (box-to-box midfielder) emaw, No. 10 (attackng midfielder) emaw a ni thei tiin an fuih thin a, hetiang position hrang hrangah hian a khel kual hlawm nghe nghe a ni.

No. 4, No. 8 leh No. 10 te hi belh khawm chuan 22 a chhuak chiah a, hei vang hian Jude Bellingham pawhin he number kher hi a thlang ta thin a ni.

Mike Dodds chuan, “Kum 7 mi leh a nih laia Jude Bellingham kan hrual chhoh tan lai vel kha ka la hre chiang khawp mai,” a ti.

“A che vel ka en khan pangngai tak a ni tih ka hre thei a, mi dang aia chungnung erawh a ni chuang lo a. Kum 13 a tlin chhoh vel atang khan hma a sawn belh nasa a, a tha chho tial tial bawk a ni,” a ti bawk.

A sawi zelnaah, “Kum 13, kum 14 vel a nih chiah khan mipa naupang dang ang bawkin No. 10 nih kha a duh ve a. Khatiang rilru a put tan avang khan ngunthluk deuhin kan titipui a, position pakhatah chauh inpumpek lo tura kan duh thu kan hrilh a ni,” a ti.

“A hnenah 22 a nih theih kan rin thu kan sawi a, hei hi a la thutak em em a, a hmel pawh a rawn eng sawt a. Holding midfielder emaw, box-to-box midfielder emaw, attacking midfielder emaw a nih theih thu kan hrilh atangin kan sawi position hoah hian a khel kual thei hlawm a ni,” tiin Dodds chuan a sawi.

Birmingham City tana a khelh tan tirhah number 22 a duh thu Bellingham hian a sawi chhuak a, club lampang pawhin a duh ang hi an pe a, tun thlengin he number hi a la thlang zui ta zel a ni.