Jeremy Lalrinnunga hi October ni 26, 2002 khan Civil Hospital Aizawl ah a piang a, a pa chu Lalneihtluanga a ni a, a nu chu Pi Lalmuanpuii a ni a, tunah hian Govt.Complex Aizawl ah sorkar quater ah an cheng mek a ni.
Mizoram Weightlifting Association chuan September ni 24, 2011 khan State Sports Coaching Centre (SYS) Govt.Complex ah Weightlifting Academy a din a, hetah hian Pu Malsawma Khiangte, (NIS) Weightlifting Coach (SYS) leh Pi PC Remlalliani (NIS) hnen a\angin Weightlifting technique mau bung leh tui connection pipe bung a tangin bul an tan a ni.
Jeremy hian October thla 2011 atangin Weightlifting technique Catch them Young ah a zir tan a, hetah hian naupang zirlai mipa 43 leh hmeichhia 38 in hming an ziak lut a, thla khat hnuah Weightlifting a talent deuh te thlang chhuak in Mipa 15 leh hmeichhia 8 thlan chhuah an ni. Catch them Young zirlai atang hian Army Assistant Coach Zarzokima Pune chuan Coach Malsawma Khiangte hnenah Army Boys Pune trial tura mipa naupang 3 thlang chhuak tura a rawn tih angin Catch them Young zirlai atang hian Jeremy Lalrinnunga, Jacob Vanlaltluanga leh Zakhuma te thlan chhuah an ni.
Kum 2012 January thla ah Army Boys Pune ah an pathum hian trial neiin an pathum hian an tling vek a ni. Pune Army Boys ah hian Army Foreign Coach Gubala, Slovakia leh Zarzokima Assistant Coach te hnen atangin Weightlifting ah hma a rawn sawn chho zelin Army ah Kum 4 (2012 - 2015) an zir meuh tawh chuan Kum 2016 ah Sub Junior National Weightlifting Championships Youth ah telin 50 kg ah Gold la nghal in ( Snatch bikah 90 kg zovin New National record a siam a, tun thlengin he record hi an la break lo.
Jeremy hian Jacob Vanlaltluanga 50 kg ah Bronze leh Zakhuma 56 kg ah Bronze an la ve bawk. Jeremy Lalrinnunga thian Jacob Vanlaltluang leh Zakhuma te pawn International level ah medal an dawng ve ve tawh a ni. Jacob Vanlatluanga hian Asian Youth 2018 Silver medal leh 2019 Commonwealth Youth leh Junior ah Gold ve ve a la tawh bawk.
Zakhuma hian Commonwealth Youth 2017 ah Silver medal lo la ve bawk. Jeremy Lalrinnunga hi Go Sports Foundation, Begaluru chuan ei leh in, thuamhnaw leh inenkawlna zawng zawng an tum sak vek a, kum 2017 leh 2018 Go Sports Foundation Sports Award a dawng nghe nghe. Army lamah chuan Youth Olympic Gold medal lak lawmpui nan Naik Subedar hna pek a ni.
India sorkar chuan India infiammite an tih that leh zual theih nan a hran a enkawl bik tur Target Olympic Podium Scheme (TOPS) a siam a, Jeremy pawh telve in Olympic lo awm tur Kum 2020, 2024 leh Commonwealth Games 2022 lo awm tur inbuatsaihna atan thlan a ni. Sports thuamhnaw leh hmanraw siam chhuaktu lian leh lar Adidas nen Kum 2022 thleng thawh ho na contract sign a ni.