Pathianni zing khan Australia-ah Jeff Horn leh Manny Pacquiao an inhnek, chak ngei tura rin Manny Pacquiao chu a chak lo zawkah a tang, Unanimous Decision-in Jeff hi a la chak zui!

Pathianni nileng social networking titi a ni a, heavyweight champion hlui Lennox Lewis pawh a ngaihdan a ni bik lo, a tawngchhuak ve ta hial.

"Woww.. Unanimous Decision-in PAC a tlawm a maw? Judge pakhat phei chuan 117-111 lai a pe? Ka fight en kha a ni ta lo zawk em ni?

"Hei tak hi alawm boxing-a thil diklo awm thin chu. Horn kha khel tha hle mahse chak em tur chuan kawng engkimah a khan lo deuh a ni," tiin Lewis chuan twitter-ah a tarlang a ni.

Kha fight-ah khan 117-111, 115-113, 115-113 in Horn kha a chak a, WBO Welterweight champion a ni ta. Hetih lai hian TV atanga ngun taka lo thlir tu mi thiam tak takte points pek dan nen a inang thei lo.

ESPN-in a lo chhut dan chuan Horn khan vawi 92 a vai chhuak, chung zinga 15 per cent chiah chu a hnek fuh, hetih lai hian Pacman erawh chuan vawi 182 hnekchhuakin, heng zinga 32 per cent chuan a khingpui point a fuh a ni.

An inhnek laklawh laiin referee khan Horn kha warning a pe nghe nghe a, "I theihtawp chhuah ve rawh, chuti a nih loh chuan round dawt lehah hian fight hi ka titawp dawn a nia," tiin.

Pacman chuan judge te thutlukna a zah thu a sawi rualin inhnek that leh a duh thu a sawi tel nghal a, Australia-a an inhnek leh te a nih ngawt loh chuan mipui ten Pacman a chak an ring vek ti ila kan sawi sual lovang.