Bayern Munich CEO Karl Heinz Rummenigge chuan tun hnaia Spain lam pana James Rodriguez kal tur anga sawi awm fo chu thu belh chian dawl lo mai a nih thu a sawi a. James hian Real Madrid lama let leh a tum loh thu a sawi.
Spanish media lar tak Marca leh La Sexta te chuan James Rodriguez hi Real Madrid zawm leh tum hnai angin an ziak a. Kum 27-a upa James hi Madrid coach Zinedine Zidane hnuaiah a tla na lutuk lo a, inkhelhna hun a chang tlem hle a, hei vang hian German champion hi loan in kum hnih chhung atan a zawm a, a hun chanve vel chu a hmang zo chiah a ni.
Real Madrid hian May thlaa chhuak ta Zidane thlaktu Julen Lopetegui an nei ta bawk a, hei vang hian James chuan Bernabeu lama kir leh tawh hi a rilruk niin an sawi a. Thawhtanni khan James Rodriguez-a agency Gestifute chuan Colombia international hian tun nipui chhunga Bayern Munich a chhuahsan theih loh thu sawiin, club pahnihte chuan an inremna bawhchhiat an duh lo ve ve dawn niin an sawi.
Rummenigge pawhin agency thu chhuak hi a thlawp vat bawk a. “Spain lamah thu a thang nasa hle a, mahse heng thuthang tam zawkte hi awih chi an ni lo a. Mi tam zawkin James chungchang hi kan hre chiang a, contract a la neih dan pawh tlang hriat a ni a. Season kan hman chhoh leh turah pawh kan hnenah a la khel zel dawn a, chumi hnuah pawh Bayern-ah hian a khelh reng ka beisei,” a ti.
Bayern Munich hian James Rodriguez hi kum hnih chhung loan-a an chhawr hnuah an duh a nih chuan €42 million in an lei thei dawn a. Tun hnaiah khan Bayern hian Stuttgart atangin Benjamin Pavard chu lakluh an rilruk niin sawi a awm a, Pavard hian release clause €35 million a nei a, hei hi Bayern chuan theh chhuah an hreh lo niin an sawi.
An sawi dan chuan Bayern Munich hian FIFA World Cup lai khan France defender kum 22-a upa Pavard khelh dan chu an duh em avangin an be fel vek tawh a. Hetiang a nih avang hian a release clause a sang lutuk lo bawk a, lei chhuah mai hi pawi an ti lo niin an sawi bawk.
Benjamin Pavard hian Stuttgart-ah 2021 thleng contract a la nei a, season hmasa khan match khelh loh a nei lo a, Stuttgart chu pasarihna a nihpui a ni.
Arsenal, Tottenham, Liverpool leh Borussia Dortmund te chuan World Cup-a France tana right-back a khel, Stuttgart tana central defence-a khel hi an beisei hlawm a ni.