Nilaini zan zanlaiah Bayern Munich leh Chelsea te an inhmachhawn dawn, Champions League match-a an inhmachhawn hunah hian Nicolas Jackson chuan a club Chelsea a hmachhawn thei dawn bawk a ni.

Bayern Munich coach Vincent Kompany chuan Nicolas Jackson nen an inkawm chungchang a sawi chhuak a, Chelsea chhungkaw chungchang pawh a hriat nual thu a sawi tel bawk.

Tun nipui bazar inhawn lai khan Jackson hian loan-in Chelsea atangin Bayern Munich a zawm a, tun season chhung atan German club tan a khel dawn. Senegal international, kum 24 mi hian inrinni khan Hamburg hmachhawnin Bayern Munich tan a debut game a khel a, Chelsea-ah kum hnih chhung hun hmang tawhin, Enzo Maresca hrechiangtu a ni bawk.

Thla 12 liamta chhunga Chelsea khelh dan kha Kompany chuan a lo zir chian nasat thu a sawi chhuak a, Jackson-a nena an inkawmna pawh a chhinchhiah vek thu a sawi bawk.

"Jackson nen kan inkawm alawm, a thusawi te ka chhinchhiah e. Season liamta chhunga Chelsea game 40 emaw vel lai chu uluk takin ka en. Club World Cup-ah khan kan khel ho a, an hmachhawn team tam tak kan hmachhawn ve bawk.

"Season liamta khan Chelsea hi team zirchian tlak nia ka hriat avangin uluk takin ka zir chiang. Chutih rualin thil danglam leh ropui em em ti thei club an ni bik lem lo tih erawh ka hre thei.

"Maresca hi ka mi hriat chian a ni a, Chelsea chungchang zir chiang viau mah ila, kan homework kan tih that si loh erawh chuan awmzia a nei dawn lo a ni. Chutih laiin Enzo-a'n a player te hnena a sawi tur chungchang erawh ka hre lawk thei mai.

"Khelh dan phung kan nei a, kal dan phung nghet kan nei. Mahse a tawpah erawh player te an pawimawh tho tho. An thiamna leh theihna an rawn hman chhuah a ngai a, chu chu thil danglamna thlentu ber a ni," tiin Bayern Munich coach Vincent Kompany chuan a sawi.