Brentford striker Ivan Toney chuan laka hremna awm a tuarchhuak ta a, thla riat hnuah a zalen ta.

Kum 27 mi hian pawisa inthap avangin hrem a tawk a, The Bees tan eng intihsiaknaah pawh a khel thei leh tawh. Premier League season zo taah khan game 33 khelin goal 20 a khung a, Tomir thla atanga hrem niin kum khat dawn a chawl.

"Wifi connection hloh ta ang mai kan ni a, tunah chuan tha takin kan inzawm leh ta. Phurrit tlak ang maiin ka zang huai a, a hma aia zalen zawk niin ka in hre bawk." tiin Sky Sports hnenah a sawi.

England striker hian Football Association dan kalhin pawisa alo thap nasa a, nikum Mimkut thla atang khan training zawm an phalsak. Inrinni zana Nottingham Forest an mikhual hunah a tel nghal dawn a, a hma hunah hmachhawp lian tak tak a nei.

Sawi chhunzawmin Newcastle United leh Wigan Athletic striker hlui chuan, "Club lian tana khelh ve ka chak a, a hlawhtlin theih nan theihtawp ka chhuah ang. Player tinte hian club lian tana khelh kan duh vek a, nomawi chawi tuma beih leh a boruak hip vel kan suangtuah thin.

"Mipui vantlang hmuh loha game kan neihah ka che tha a, training-naah pawh ka ti tha viau ni chuan ka hria. Mahni insitna leh inchhirna in hunrei tak min tlakbuak a, tunah chuan mithar ka ni tawh." tiin a sawi.

Tun thlasik tir lam khan Brentford chhuahsan tur angin chanchin a nei a, Arsenal leh Chelsea-te nen sawizawm niin an thawm a reh ta deuh. An hrem chhan ber pawisa inthap hi a atchilh hle tih amah enkawltu psychiatrist Dr Philip Hopley chuan a sawi a, tanpuina a mamawh tih FA hnenah a thlen bawk.

Hetianga enkawlna a dawn that avang hian a laka hremna an tinep a, thla 11 chhung hrem tura an tih kha thla thumah anti hniam. FA regulatory commission chuan an titipui tumin, Toney hian vawi tam tak dawt a sawi tih an hmuchhuak a, football-ah chiah pawisa a thap thin tih an sawilang tel bawk.

FA hian a tirah chuan thla 15 chhung hrem an tum a, hre reng chunga tisual anih avang leh, a tihsual thup a tum tlat avangin an lawm lo hle. English striker hian midang kaltlangin pawisa a thap tam a, ama hminga tih pawh a nei hnem hle.

FA betting rules hi 2017 Ramtuk thla leh 2021 Pawlkut thla inkar khan vawi 232 lai a bawhchhia a, nikum Ramtuk thla khan dan a bawhchhe ngei tih a sawi. Thla riat an hrem bakah hian £50,000 an chawi tel a, tun hnua ti tawh lo turin hriattir a ni bawk.

A tihsual ngei tih a pawm hnu hian thla 11 chhung hrem an tum a, enkawlna a dawng tih an hriat chian hnuah an ti tlem leh ta a ni. Amah ang tho hian Dr Philip Hopley pawh an kawm ngun khawp mai a, thil nih dan dik tak sawiin zep leh thup a nei hran lo.

Brentford chuan a thil chin tha lo tak hi a bansan theih nan an pui dawn tih an sawi a, a chhungte pawh a theih ang angin an chhawmdawl dawn tih an sawi. Professional Footballers' Association (PFA) pawhin pawisa inthap vanga buai mekte tanpui an peih reng tih an tarlang a, dan kalha che lo turin player dangte an chah bawk.

Toney hian season nga chhung zet chu inthapna lamah hun a hmang a, hemi hun chhung hian Newcastle United, Scunthorpe United, Wigan Athletic, Peterborough United leh Brentford-ah te a khel. Dan vawi 232 a bawhchhiatah hian an telna tournament ami game 126 a awm a, pawisa a thap dan chu hetiang hi a ni.

1). Vawi 29 chu an team lam hawi zawngin pawisa a dah.

2). Vawi 29 zinga vawi 16-ah hian an team chak turin a ring a, hemi zinga game 11-ah hian a khel.

3). Vawi 29 zinga ala bang zawng vawi 13-ah an team chak lo turin a dah a, hetah hian a inlan lo vek bawk.

4). Vawi 126 zingah hian a pet goal ringin vawi 15 chu pawisa a dah a, a khelh dawn leh dawn loh a hriat lawk theihloh avangin a in ring ngam lutuk lo.

FA regulatory commission chuan a chetdan hi match-fixing angin an ngaihsak lova, an team chak lo tura a rinnaah hian a teammate emaw midang emaw a be hmasa tih finfiahna a awm lo.

FA hian pawisa inthap chungchangah dan khauh tak an nei a, Article E8-ah betting hi an phal lo bur tih an tarlang. Hrem anih chhungin football kaihhnawh engmah a ti thei dawn lova, hremna zawh hma thla li la awmah team training a zawm thei thung ang.

2022 Sahmulphah thla khan dan a bawhchhia tih hriatchhuah a ni a, a tirah pha ve viau mahse a tang rei ngam ta lo. Premier League season kal mekah game 33 khelin vawi 20 a pet goal hman a, hremna a nun nghal avangin a khel chhunzawm lo.

Brentford tan 2025 nipui thleng daih contract ala nei a, club dan a bawhchhiat loh avangin an hrem ve lo. Intihsiakna a khelh hnuhnun ber chu nikum Tomir thla ni ruk kha a a ni a, Anfield-ah 1-0 in Liverpool an hneh lo a ni.

Brentford hian defender thar an nei a, Tottenham left-back Sergio Reguilon niin tun season tawp thleng an hawh ang. Kum 27 mi hian Manchester United-ah season chawhma lam a hmang a, tun thla tir khan an inremna ti tawpin Spurs-ah a kir.

The Bees manager Thomas Frank chuan, "Chanchin lawmawm a ni a kan hlim khawp mai. Left-back tha kan mamawh zia kan sawi ho fo a, tunah chuan kan duh tak kan nei ta. Kan mamawhnaa awm turin a tling tawk a, tlarhma a pui thei bawk nen kan tangkaipui ang." tiin a sawi.

Reguilon hian United-a hun a hman chhungin game 12 a khel a, inkhel bultantu zingah vawi sarih telin Luke Shaw leh Tyrell Malacia-te hmunruak a hnawhkhat. Toney rualin Inrinni zanah a inlan nghal a rinawm a, theihtawp chhuah a tum tih a sawi a ni.