Gujarat Titans chuan Indian Premier League-a an season hmasa berah Final an lut nghal a, Thawhlehni zan khan playoffs Qualifier 1-ah 5 wicket-in Rajasthan Royals an hneh.
Titans tan hian David Miller a che ṭha hle a Player of the Match lawmman hlan a ni.
INKHEL CHANCHIN
Rajasthan Royals
20 overs - 188/6
Gujarat Titans
19.3 overs - 191/3
5 wicket-in Gujarat Titans an chak.
Player of the Match - David Miller (Gujarat Titans)
Eden Gardens-a inkhelah hian toss-a chak zawk Titans-in vawm hmasak an thlang a Rajasthan-in an vaw hmasa.
IPL season hmasa bera champion team tan hian Jos Buttler chuan 89 run siamin a hmuhnawm khawp mai a, 4 run ringawt pawh vawi 12 lai a vawchhuak.
Buttler a ropui viau lai hian opener Yashasvi Jaiswal erawh 3 run lek neiin a chhuanawm loh hle.
India squad-a lang pha lo Sanju Samson pawhin 47 run neiin team a pui ṭha ve viau a, Devdutt Padikkal pawh 28 run siamin a nawi lutuk lo.
Yashasvi hnungzuia che chhe zingah Shimron Hetmer leh Riyan Parag an tel a, 4 run ve ve chiah siamin an thawhhlawk lo hle.
20 over an vuak hnuah Rajasthan hian 188 run an nei tling a mi paruk an chan.
Titans vuak hun a thleng ve ta a, opener Wriddhiman Saha tihloh chu fak tlak vekin an khawsa.
Saha hian run khat pawh siam lovin khelmual a chhuahsan a, a vuak hawnpui Shubman Gill erawh 35 run neiin a che chhe hran lo.
Matthew Wade pawh Gill siamzat ang bawk neiin an team tan a thawhhlawk ve viau a, team captain Hardik Pandya che ṭha hretin 40 run a vawchhuak.
Miller hun thleng ve thungin 6 run vawinga a rawn hlapchhuak a, 68 run siamin an an team hnehna a chanpui.
Bowling lamah Rajasthan tan langsar fal an awm lova, Trent Boult leh Obed McCoy-te mi pakhat ve ve an vawm out.
Titans bowler zingah pawh fak hluai tur an awm hran lo. Mohammed Shami, Yash Dayal, Sai Kishore leh Pandya-te'n wicket khat ṭheuh an la a batsman an thi tam lo.
Hnehna chang zo lo mahse Rajasthan hian Final luh theihdan an la nei a, Eliminator match-a chak zawk zawk hmachhawnin Final luh theihna kawng khat an la nei.
Eliminator match-ah hian Lucknow Super Giants leh Royal Challengers Bangalore an intum dawn a, Nilaini zan hian Eden Gardens-ah tho an inhmachhawn dawn a ni.