Inter Milan chuan an striker hlui Romelu Lukaku chu Chelsea atanga lakluh leh theih an inbeisei hle niin Sky Sports chuan a tarlang.

Chelsea hian Lukaku hi tun nipui bazar chhunga chhuah tir dan an zawng mek a, Inter nen hian indawr mekin, an inbiakna pawh a kaltluang hle niin a lang.

Chelsea leh Inter te hian inremna an nei thuai dawn a, Lukaku tan hian Chelsea-ah chance a awm tawh rih lo niin Sky Sports chuan a tarlang bawk.

Inter hian Lukaku hi loan-a lakluh an tum a, loan-a fee ah euro maktaduai 5 thehchhuak mah se, Chelsea hian euro maktaduai 10 an duh avangin club hnih te hi kar hmasa khan an inrem thei lo. Inter hian euro maktaduai 10 tling lo deuh thehchhuah an inhuam tawh nia tarlan a ni a, hei hi Chelsea chuan an pawm dawn nia tarlan a ni bawk.

Nikum nipui bazar lai khan Chelsea hian Lukaku hi pound maktaduai 97.5 ngawt sengin Inter atang hian an lei a, Lukaku hi Chelsea player man to ber ni mah se, beisei a pha lo hle a, season liamta khan Premier League-ah Chelsea tan vawi 26 inlanin goal 8 bak a khung lo a ni.