Major League Soccer club Inter Miami chuan Barcelona player hlui dang lakluh an tum mek a, Luis Suarez chu an hnaih tawh hle niin chanchinbu mite chuan an tarlang.

Tun kar khan Brazil top flight league season a zo a, Suarez hian Brazilian club Gremio chhuahsan zuiin, tunah hian free agent a ni mek a, US lamah a input luh a rinawm chho hle.

Kumin nipui lai khan Inter Miami hian Barcelona player pathum ngawt an lalut a, Lionel Messi, Sergio Busquets leh Jordi Alba te niin, Suarez hian Barcelon-a a team mate hlui te hi America lamah a zawm ve leh lovang tih a sawi theih loh.

Nipui lai khan Suarez hi Inter nen hian sawi zawm a lo ni tawh a, mahse Brazil-ah season kal lai a laklawh avangin Suarez hian Gremio-a season a hmang tluan a, tunah hian free agent a nih tawh angin Inter hian free transfer-a lakluh an tum mek niin chanchinbu mite chuan an tarlang.

Suarez hian Inter a zawm a nih chuan a hlawh nasa takin a tlahniam dawn nia tarlan a ni a, mahse kum 36 mi hian Messi, Busquets leh Alba te bula khelh leh a chak avangin, hlawh hniam zawka Inter zawm a hnial lo nia sawi a ni.