Juventus forward Cristiano Ronaldo chuan Selena Gomez chu khumin Instagram follower ngah ber a ni ta a. Cristiano Ronaldo hian a hmaa pakhatna Selena Gomez chu 49,546 in a khum a, a chungnung ber a ni tawh a ni.

Tun hnaiah Portuguese star Cristiano Ronaldo chu hmingtha tho mahse pawngsual chungchanga puhtu an awm a, a hmingchhiat phah deuh bawk a. Heti chung hian follower erawh a neih belh nasa hle thung a, a hmaa follower ngah ber Selena chu a khum thei tlat a ni.

Khawvel hmun hrang hrangah Instagram hmangtu an thahnem hle a, milar phei chuan an intihhmuh bakah an larpui lehzual hle tawh a. Khawvela Instagram hmangtu zawng zawng zingah kum 26-a upa pop star Selena Gomez chu follower ngah ber a ni chho reng a, mi maktaduai 144 chuang zetin an follow tawh a. Tun hnaiah Ronaldo hian follower maktaduai 144 chuang a rawn nei chho ve leh a, Selena hi 49,546 in a rawn khum thei ta a ni.

Kum 33-a upa Ronaldo hian fa pali a nei tawh a, a mi mal thlalak neihte chu a humhalh hle a, social media lama a nazawnga tlangzarh a duh ngai lo a. Hetih rual hian 2016 atanga a bialnu Georgina Rodriguez chuan Instagram lamah hian thlalak a pho chhuak nasa hle thung.

Georgina Rodriguez hian Cristiano Ronaldo fate thlalak vel chu a dah chhuak nual a. Cristiano Ronaldo Jr., a fa phir - Mateo leh Eva Maria thlalak te leh a fanu Alana Martina dos Santos thlalak te chu Georgina Rodriguez hian Instagram-ah hian a dah nual tawh a ni.

Football khawvela Cristiano Ronaldo elpui ber tia sawi theih Lionel Messi chu Top 10 ah hian a lang pha ve lo a. Barcelona leh Argentina superstar Messi hian follower maktaduai 100 chuang chu nei mahse Top 10 a lang pha tur khawpin follower a la ngah tawk lo a ni ber.

Ariana Grande chuan pathumna dinhmun a hauh a, maktaduai 132 velin an follow a, a hnuai chiahah hian follower 120 neiin Kim Kardashian a awm bawk a. Beyonce, Dwayne ‘The Rock’ Johnson, Kylie Jenner, Taylor Swift, Neymar Jr leh Justin Bieber te chu Top 10-ah hian an lang a ni.