Paris Saint-Germain manager Thomas Tuchel chuan an player pawimawh Kylian Mbappe chu Champions League semi final-ah inkhel bul tan thei khawpa a dam tawh thu a sawi.

Champions League semi final-ah PSG hian German club RB Leipzig an hmachhawn dawna, Thawhlehni zanlai dar 12:30ah an inkhel dawn.

Kum 21 mi Mbappe hian Champions League quarter final-a Atalanta an hneh tum khan a ngal rek a tih nat avangin inkhel bul a tan thei lova, mahse second half-ah dah luh niin, game a ti danglam hle bawk a, PSG tana a pawimawh zia kan hmu.

Tuchel chuan, “Atalanta lakah minute 30 a khela, tunah chuan a aia rei khel thei a ni tawh. Inkhel bul a tan thei tawha, minute 90 a khel thei dawn em erawh sawi theih a ni lova, inkhel bul a tan dawn em chu kan ngaihtuah tha leh ang,” a ti.

Tuchel chuan a player pawimawh ber pahnih Neymar leh Mbappe te chungchang sawi zuiin, “Danglamna an siam renga, an pahnih neih kawp hi a tha em em a, Neymar hian ball a khalh theia, Kylian hian team-ah speed a rawn keng luta, engtik lai mai pawhin goal thun chakin a ril a tam bawk.

“An khelh dun hian an tha em em a, Neymar hi leader ang zawngin a tha zawka, quality a nei sangin, khelmualah a confi em em a, a huaisen bawk. Chak a duh renga, theihtawp a chhuah renga, inel hi nuam a ti a, chu chu leader tha ni tur chuan a pawimawh hle a ni,” a ti.