Liverpool manager Jurgen Klopp chuan a midfielder Alexis Mac Allister hliam chu a rin aia a nat thu a sawichhuak a, hetih lai hian hun rei tak chawl tur ang chi erawh a ni lem lo thung.

Si hnih faia Sheffield United an hneh tum khan Argentina international khup hi a kak palh a, tuam niin a inkhel chhunzawm. Mahse minute 57-ah lakchhuah a ni ta tho a ni.

"Macca hi a tha vak lo, ni tinin a dinhmun kan en zel ang. Inkhelh zawh khan a hliam kha a nat vak kan ring lo a, chutianga serious tak erawh a ni lo.

"Hetih lai hian tun inrinni match-ah erawh ka beisei lo. Kar leh Ninganiah emaw, Pathianniah emaw chuan kan beisei a, mahse a dinhmun kan en zel ang," tiin Jurgen Klopp chuan a sawi.

Liverpool hian tun inrinni hian Crystal Palace an hmachhawn dawn a, kar leh kar laihawlah Union Saint-Gilloise an hmachhawn leh ang a, Pathianniah Manchester United an mikhual dawn a ni.

Brazil keeper Alisson erawh a dam chho mek a, Palace hmachhawn ve tumin training pawh a zawm tawh. Ani hian November ni 25-a Manchester City an hmachhawn tum khan kaiza hliam avangin harsatna a tawk a, Reds tan a la inlan leh lo.

"Alisson chu a tha e, tun inrinnia inkhel tur hian a tha tawk em tih erawh ka hre chiah lo, a dinhmun kan endik ang," tiin Klopp chuan a sawi bawk.

Liverpool defender Joel Matip erawh a season a tawp ta a, khup hliam avangin tun season chhung chu a hmel kan hmuh theih a rinawm tawh loh. Andy Robertson, Thiago Alcantara leh Stefan Bajcetic te nen an chawl rei deuh dawn.

Kum 32 mi Matip hian tun season bak Anfield-ah contract a nei tawh lo, mahse contract thar an zawrh leh erawh a rinawm hle.

"Kan club hian a chungah zahna an lantir ngei ka ring, a phu em em a, a hliam hi kan ngaihven em em bawk, a rawn dam leh thuai ang. Contract thar pawh an pek ka ring a, mahse hei erawh keima thutlukna tur a ni lo," tiin Klopp chuan a sawi bawk.