July 14, 1998 a piang, Indian professional footballer Abneet Bharti hian hriat a la hlawh vak lo hle a, tunah hian Portuguese club Sport União Sintrense tan a khel mek a, amah chiah hi Indian footballer zingah Europe khawmualpuia khel thei a ni rih.
Bharti nu leh pa hi India mi niin, Kathmandu, Nepal-ah a piang a, India leh Nepal tan a khel thei ve ve a, India youth team-ah pawh a lo tel tawh a, senior team lamah hian an la ko ve lo thung.
A tetlai atangin football hi a tui chilh hle a, centre-back/defensive midfielder niin New Delhi vela club lian lem lo tak Shastri FC ah a khel ve thin a. Hemi hnu hian a pa hnathawhna avangin Singapore-ah an insawn a, hetah hian S. League club Geylang International FC chuan an lo hmu fuh a, an lalut zui a.
Kum 13 a nihin U-16 squad ah an telh chho a, hemi season tawp lamah hian U-18 tan pawh a khel chho tan a. A khelh chhiat lem loh thin avangin a contract pawh an pawtsei zui nghe nghe a.
Geylang International FC atang hian an hmelma Balestier Khalsa lamah kum 14 a nihin a lut zui a, youth team atangin reserve team lamah a chho nghal vat a. Coach Marko Kraljevic chuan kum 14 chauh ni mahse first team lamah a chhawr chho zeuh zeuh a. Hma sawn zel duh vangin Spain lam pan zai a rel a, Real Valladolid a zawm zui a.
2014-2015 season tan hma khan Bharti hian Spanish club Real Valladolid hi a zawm fel a, hetianga a zawm theih chhan hi scout Daswani vang a ni ber a. Daswani hian Bharti hi a hmu fuh a, theihtawp a chhuahpui hnuah youth club velah hmun a chang zui ve nghal a ni.
Abneet hi a che tha thei phian a, hei vang hian European club thenkhat chuan an hmu tai hle a. A bik takin R.S.C. Anderlecht, Eintracht Frankfurt, TSV 1860 Munch, SV Darmstadt 98 te chuan an thlithlai deuh reng a, an club-a training turin an sawm fo bawk a. Mahse, FIFA in kum tling lo te transfer chungchanga dan khauh tak a zam avangin contract a ziah a rem si lo a, transfer chu a tih theih ta thin lo a ni.
A pa chu Poland lamah an sawn leh a, Abneet pawh kum 16 a tling ve ta bawk a, Podbeskidzie Bielsko-Biala tan trial a paltlang a, a vawi khatna atan professional contract a ziak zui a. Podbeskidzie Bielsko-Biala hi Poland rama inelna sang ber Polish Ekstraklasa club an ni a. Amaherawhchu, rei pawh a khelh hmain an club chhung boruak neuh neuh avangin Abneet Bharti hian Real Valladolid lam pan a thlang leh ta zawk a.
2014-2016 chhung khan Real Valladolid ah hian first team-ah hmun a chang thei meuh lo a, hei vang hian a khelhna thlak a rilruk a. January 2017 khan Bharti hian tuna a khelhna, Portuguese club Sport União Sintrense lam hi a pan ta a. Head coach Luis Boa Morte chuan Bharti hi a thlem chhuak a ni ber a, Sporting Lisbon nen an inkhelh tumin Bharti hian right-back position-ah a khel a, khelmuala naupang ber a ni nghe nghe a. Sport União Sintrense tan hian game 7 khel tawhin goal 1 a thun tawh a ni.
Abneet Bharti hi tunah kum 19 niin, feet 6 leh inches 1 a sang a ni.