India doubles badminton coach Tan Kim Her chuan Olympic a India aiawha inkawp tur a thlithai tan.
Malaysian Tan Kim Her hian 2018 Commonwealth Games ah India chu a chet thatpui hle a, a aia ropui zawk thlenpui zel a duh thu a sawi a, Olympic chu tuna a tinzawn ber a nih thu a sawi.
Tan Kim Her hi coach atana an lakna la rei lo viau mahse badminton chuan hma a sawn phah nasa khawp mai a. Commonwealth Games khelh zawh takah khan India chu badminton bikah chuan che tha ber an ni a, medal paruk an la a, hetiang dinhmuna ding thei tur hian doubles player te an thawh hlawk hle.
Ashwini Ponnappa leh Satwiksairaj Rankireddy te chu Tan Kim Her hian a inkawp tir a, a vawi khatna atan Malaysia mixed doubles team te chu an hneh a, gold medal an la a. Satwik leh Chirag Shetty te pawhin men’s doubles silver medal an la a, women’s doubles lamah Ashwini leh Sikki te chuan bronze medal an la bawk a ni.
Tan chuan India double team te chu Tokyo Olympics ah an chet that a rin thu sawiin, player te an tha hlawm bawk a, anmahniah beiseina sang tak a neih thu a sawi a. CWG-ah khan che tha viau mahse, kha kha chu thil te tham mai a la nih thu a sawi a, a aia boruak sang zawk luhchilh a tum thu a sawi.
“Helai hmuna ka rawn awm tirh khan singles kha an buaipui ber a ni a. Player te chu ka kawm kual a, ka sawipui nasa a. An che tha thei viau a, kei pawhin ka fak thin a, mahse a la tawk lo a. A aia sang hi ka la duh zel a, ka thlir ber chu Olympics 2020 a ni,” Tan chuan a ti.
A sawi zelnaah, “2020 ah hian chi thumah kan tling thei ngei dawn tih hi ka ring nghet tlat a. Amaherawhchu, tel ringawt kha ka duhtawk lo a, medal hawn ngei ka duh dawn a. Tunah hian hun kan la nei tha a, kum hnih vel inpuahchahna hun a la awm a. 2019 atang phei chuan tun aia ngawrh lehzual a hma kan lak a ngai a, Olympic 2020 ah chuan kan langsar tur a ni,” a ti bawk.
A duhthusam thlentir thei tur chuan inkawp fuh tur a hriat fuh a ngaih thu Tan hian a sawi a. Tun atangin inkawp turte hi a ngaihtuah kual nasa a, a fuh dan ber tur ngaihtuah thiam nghal erawh a harsa rih niin a sawi.