Leicester City leh Chelsea midfielder hlui Danny Drinkwater-a social media post chu comment tu leh ngaihventu an tam hle.

Footballer hlawh hnem tak ni thin kha tunah chuan in sain a inhlawh tawh a, a tlachhe ta lutuk chu mi tam takin an nuih a, an hau bawk a, thenkhat erawh chuan an fak thung bawk.

Kum 34 mi Drinkwater hian nikum October thla khan football khelh a chawlhsan a, 2021/22 season khan loan-in Reading-ah a khel a, free agent a nih hnuin chhawr duh an awm ta lo a, football khelh a chawlhsan ta a ni.

Manchester Academy chhuak hi Leicester City-ah ropui takin a invawrh, Premier League title lain, Chelsea chuan £35million laiin an lei bawk.

Chelsea-ah khan kar khat chhungin £120,000 lai a hlawh a, loan-in Burnley, Aston Villa, Kasimpasa leh Reading-ah te a khel kual bawk.

Rilru lama harsatna a neih thu te a sawi chhuak a, zu rui chunga motor khalh avang leh nightclub pawna buaina te avangin thubuai a nei bawk a nih kha.

Football a chawlhsan hnuin sumdawnna lam a luhchilh ve a, November thla khan a restaurant chu a hlawkpui lo hle a, £782,000 lai a hloh niin The Sun chuan a tarlang. Hemi avang hian £2m lai ba a neih phah bawk nia report a ni.

Restaurant dangah  70 per cent stake a lei leh a, he restaurant pawh hi khar a ni leh tawh bawk nia report a ni.

Drinkwater hian eizawnna dang a dap chho ve zel a, tunah chuan in sain a inhlawh nia sawi a ni. Instagram lamah followers 585,000 lai nei vein, heta a hnathawk thlalak post chuan ngaihven a hlawh a, a tlachhe ta lutuk chu mite mak tih a tling hial a ni.