International break a zo a, club football an khel chho leh dawn. Manchester United chuan inrinni zan hian Brentford an hmachhawn dawn a, Erik ten Hag chuan media a hmachhawnnaah chanchinbumite a hau deuh hlak.

Tottenham lakah si thum faiin an tlawm a, Aston Villa nen an inhnehtawk chhunzawm. Game hnuhnung 5-ah chak an nei lo a, Premier League-ah 14-na niin, international break hma chiah khan Ten Hag chu ban mai hlauhthawnawmah a awm niin media te chuan an tarlang nasa.

Zirtawpni khan Ten Hag chuan chanchinbumite a hmachhawn a, "Hetiang thu lengvak bengchheng tak tak hi nangni ho vawrh darh mai mai a ni. Thawnthu in phuahchawp a, dawt in sawi nasa bawk.

"He club hi kan inlungrual a, tum thuhmun neiin kan kal mek. Chawlh kan neih hmaa ka lo sawi tawh, chanchinbumite pawh ka hrilh hlawm che u. Club chhungkua hi kan inlungrual, chu chu in awih lo a ni.

"Tuna kan dinhmunah hian keini pawh kan lungawi bik lo, table-a kan awmna hian kan dinhmun chu phat rual lohin a hailang alawm. 

"Chutih laiin kan chiai lo a, kan tumah kan chiang tlang a, hlawhtling turin hma lam pan turin kan inbuatsaih mek a ni," tiin Erik ten Hag chuan a sawi.