I Day Football Tournament 2022 khelh mekah August ni 9, Thawhlehni khan AR Lammualah Group B league match hnuhnung ber khelh a ni a, inkhel vawihnih awmin inkhel hmasa zawk Chanmari FC leh Mizoram Police FC te 4-4 in an inhneh tawk.
Goal difference nei țha zawk Mizoram Police FC hian table-ah pahnihna ni chungin semifinal an lut ta a ni.
Inkhel hnuhnungah Chhinga Veng FC chuan sikhat faiin Electric Veng FC an hneh a, group leader ni chungin semifinal an lut ve bawk.
Group A a țangin FC Venghnuai leh Aizawl FC ten semifinal an lut tawh bawk.
August ni 11, Ninganiah semifinal AR Lammualah khelh tur a ni a, dar 11:30-ah FC Venghnuai leh Mizoram Police FC an inkhel ang a, dar 2:00-ah Chhinqa Veng FC leh Aizawl FC an inkhel ang.
11:00AM Chanmari FC 4-4 Mizoram Police FC
(F Lalnuntluanga 39', 48', Malsawmzuala 63', Lalremruata 76') (Malsawmfela 6', 68', Ronald Zothanzama 78', Zaithanmawia 86')
First half-ah goal hnih a lut a, Mizoram Police FC chuan hun țha nei hmasa zawkin inkhel țan a țanga minute 6-ah Malsawmfela chuan D Line pawn a țangin an hmahruaina a khung. Chanmari FC tan huntawp dawn minute 6 ala awmin Tluangtea chuan hnai tak a țangin an siphurh sutna goal akhung a, 1-1 in chawlhlawk an hmang.
Second half-ah goal hnih a luh belh bawk. Chanmari FC chuan hun țha nei nghalin țan țanga minute 3 a ral hmain mual dinglam sir a țanga Bata ball vawrh țha zet chu box a awm Tluangtea chuan goal-ah chan tirin an goal hnihna a khung.
Chanmari FC chuan minute 63-ah hun țha nei zuiin Malsawmzuala chuan an goal thumna a khung leh bawk.
Mizoram Poice FC tan minute 68-ah Malsawmfela bawk chuan goal arc pawn chiah a țangin an goal hnihna a khung.
Chanmari FC chuan nawr letin minute 76-ah Remruata chuan an goal li na a khung leh ta a ni. Minute 2 aral hmaiin Mizoram Police FC chuan hun țha nei zuiin Dinliana Varte corner pet chu Ronald-a chuan goal-ah chan tirin an goal thumna a khung ve leh ta a ni.
Huntawp dawn minute 9 ala awmin Mizoram Police FC chuan corner an hmuh chu hmamg țangkaiin Dinliana Varte pet tha zet chu Zaithanmawia chuan tauh lutin an siphurh sutna goal akhung a, 4-4 a inhneh tawkin khelmual an chhuah san ta a ni.
1:30-ah Electric Veng FC 0-1 Chhinga Veng FC
(Lalrinzuala 74')
Goal awm chhun hi second half a lut a ni a, minute 74-ah Electric Veng goalkeeper Hriata tihsual nangchinin Rinzuala chuan a pet goal.