Champions League match-ah Chelsea chuan German Champions Bayern Munich an tlawh a, Allianz Arena-ah mual neitu Bayern Munich chuan 3-1 in hnehna an chang.
Harry Kane chuan goal hnih a khung a, Chalobah chuan an lamah a tih goal bakah, Chelsea lam aṭangin Cole Palmer chuan goal khat a khung ve.
Chelsea goal thum chhuah te hi tihsual avanga an lama lut te a ni hlawm a, goal hmasa ber hi minute 20-a lut niin, mual dinglam sir aṭanga Olise cross chu Chalobah chuan anmahni lamah a khak lut palh.
Caicedo chuan box chhungah Kane a titlu a, referee chuan penalty hamin, he penalty hi Kane chuan goal-ah a chantir a, si hnih faiin Bayern Munich chuan hma an hruai.
Darkar chanve an khel tling ṭep, Chelsea chuan counter attack hmangin an nawr thut. Caicedo ball pek chu Palmer chuan chak takin a tlanpui a, Malo Gusto a pek hnuin Gusto hian Palmer a pe leh. Chelsea tana a game 100-naah Palmer chuan goal mawi tak a khung, 2-1 a ni ta.
Second half minute 63-ah Chelsea tlarhnung an chebuai leh tlat mai. Gusto ball pek sual chu Kane chuan dawngin, box chhung veilam sir aṭang chuan far post lamah mawi takin a chhuih goal a, 3-1 a ni.
Hun tawp dawnah Cole Palmer chuan a goal hnihna mawi takin a khung. Estevao ball pek ṭha lutuk chu Palmer chuan box dinglam sir aṭangin a pet goal. He goal hi VAR hmanga ennawn a ni a, offside ham sak a ni.
Chelsea goalkeeper a cheṭha hle a, Sanchez hian save ṭha tak tak vawi 4 neiin, Kane leh Olise te chu ṭha lutukin a dang. Hun tawp dawnah Chelsea aṭanga loan-a Bayern Munich zawm Nicolas Jackson chu a lut ve, mahse tha a thawh hlawk hman ta lo a ni.
Chelsea hi an khel chhe lem lo a, an tihsualah Bayern Munich lamin an hrem zat zat. Chu chu thil danglamna chu a ni. Tin, Enzo Maresca khan substitute a siam har hret bawk a, Garnacho, Santos leh Estevao te kha luh hma tir deuh selang chuan danglamna an thlen thei maithei a ni.
Chelsea boss Maresca chuan, "Hetiang game inelna sangah hi chuan player te hian minute 95 chhung rilru pe takin an khelh a ngai a ni. Kan khel ṭha niin ka hria a, inkhelh chhung zawng erawh kan khel ṭha tluan lem lo thung.
"Kan khelh danah ka lawm thawkhat hle, a chhan chu inkhelh a harsa dawn tih ka hre lawk a, kan khingpuite hi hmachhawn an hautak dawn tih ka hre lawk. Hetiang game hi kan inzir zelna atan a pawimawh em em a ni," tiin a sawi.
Harry Kane chuan German club tan game 102 aṭangin goal 95 a khung tling ta a, assist pawh vawi 29 a nei tling ta bawk. Tun season-ah competition hrang hrangah Bayern Munich tan game 6 aṭangin goal 10 a khung tling ta bawk a ni.
Bayern Munich boss Kompany chuan, "Engtik lai pawhin Harry Kane-a chungchangah zawhna ka dawng, sawi tur vak ka nei lo, kan hmu alawm.
"Ball tel lo pawhin a thawk rim em em a, kan nawr dawnin tha a thawh hlawk a, penalty area a lo thleng hman zel bawk. Chance a neih theih nan a tha a seng hnem em em a, chu chu goal a khung theih phahna chhan chu a ni.
"Goal a khung theihna chauh hi mi chuan an lo hmu ṭhin a, goal a khung hmaa a thawhrim dan hi kan hmuh hmaih ṭhin a ni," tiin a sawi. Kane bakah Crystal Palace winger hlui Olise te chu Chelsea an hmachhawn zanah hian an khel ṭha dun hle a ni.