Pathianni zan khan Old Trafford-ah si thum faiin Manchester United chuan Tottenham an hneh lo.

First half tawp dawnah Bruno Fernandes hnawhchhuah a ni a, hnawhchhuah a nih hma pawhin team chungnung zawk chu Tottenham an ni tho tho.

Tun thla chhungin Old Trafford-ah United hi si thum fai bawkin a vawi hnih nan an tlawm a, September ni 1 khan Liverpool lakah si thum faiin an tlawm tawh bawk a nih kha.

Erik ten Hag-a dinhmun a derthawng niin media ten thu an vawrh darh mek a, inkhelh zawhah a dinhmun a derthawng em? Tih an zawh chuan Erik ten Hag chuan, "Chutiang lam ka ngaihtuah lo.

"Hetianga awm khawm ho zel tur hian nipui lai khan thutlukna kan siam tawh. Squad hmasawn tak neih kan tum a, chumi chungchang zawng zawng chu nipui lai khan hotute nen kan sawi ho a, thutlukna kan siam tawh a ni.

"Kan team hian hun kan la mamawh deuh. Entirnan Ugarte te hi, team-a insiamrem turin hun a la mamawh a, player inhliam rawn kir leh te nen kan insiamrem chhoh a ngai a ni.

"Hun kan mamawh a, inlungrual tak a, club neitu, staff leh player te nen thu khat vuaa kan kal a ngai a ni," tiin a sawi.

Tun season Premier League-ah vawi 3 lai an tlawm ta a, table-ah 12-na niin, khelh 6 atangin point 7 chiah an la hlawhchhuak.

Crystal Palace nen goal awm loin an inhnehtawk a, Europa League-ah FC Twente an mikhual a, 1-1 in an inhnehtawk a, Old Trafford-ah tho Tottenham lakah si thum faiin an tlawm. Ningani zan hian FC Porto an hmachhawn ang a, Pathianni zanah Aston Villa an tlawh leh dawn a ni.