Manchester United chuan Benjamin Sesko lak tumin hma an la mek a, an la lut thei a nih chuan Rasmus Hojlund-a dinhmun a derthawng dawn nia ngaih a ni. Hetih lai hian Hojlund chuan United chhuahsan a tum loh thu leh, elpui tur a duh thu a sawi chhuak ve nghal.

Ningani zing khan pre-season friendly match-ah Manchester United chuan 4-1 in Bournemouth an hneh. Hojlund chuan goal hmasa ber mawi takin a tauh lut nghe nghe.

Kum 22 mi hian season liamta khan United tan competition hrang hrangah game 52 a khel a, goal 10 chiah a khung. Premier League-ah 15-na a nihpui a, goal khung hleithei rih lo mah se, Manchester United-a awm chhunzawm zel a, a hma aia tha zawk nih a tum thu Hojlund hian a sawi a ni.

"Ka thil tumah ka chiang em em. Eng pawh lo thleng se, inkhelhna hmun chang tura beih zel ka tum. Inelna hi ka tan chuan a tha zawk a ni, min tihriamtu a ni a, elpui tur chu tu pawh nise, ka inpeih at reng e. Tu pawh lo lut se, elpui turin ka inpeih reng a ni," tiin Hojlund chuan a sawi.

Kum 2023 khan Hojlund chuan United a zawm a, competition hrang hrangah game 95 a khel tawh a, goal 26 a khung ve tawh. Che chhe over chu a ni hauh lo, chutih laiin game 4-a goal 1 khung ziah ang a ni a, hei erawh team lian elna tur atan chuan a la beitham deuh a ni.

Hojlund chuan, "United-a ka luh hlim khan Martial a awm a, ani kha a inhliam ngun hle. A khelh theih loh avang kha kei khan inkhelhna hmun ka chan hnem phah.

"Chawl rih turin miin min duh mah se, kei chuan game tin khelh ka duh a ni. Season tharah hian ka team hi pui ka duh a, season bul tha taka tan ka duh dawn a ni," tiin Borunemouth an hmachhawn zawhin a sawi.

Hojlund hi kum 22 mi lek a la ni a, ram leh club tan goal 61 a khung tling ve tawh. Erling Haaland nena khaikhin chi erawh a ni lo, Haaland kha chuan kum 22 mi a nih laiin goal 100 chuang a khung daih tawh.

Hetih lai hian England captain Harry Kane hi tunlaia goal khung thei ber zinga mi a ni a, ani pawh kum 22 mi a nih lai khan ram leh club tan goal 53 a khung. Kum 22 an nih lai ngaihtuah chuan Kane ai chuan Hojlund hian goal a khung thei zawk.

"Ka la naupang hle tih hi mi te hian an theihnghilh fo mai. Kum 22 chiah ka la ni a, tun ang kumah hian striker tha tam tak hian goal 100 an khung tling miah lo a nia aw.

"Chutih laiin theih tawpin ka inzir a, ka game khelh danah pawh hian in hmuh theih ka ring. Hma ka sawn zel a, a hma aiin ka tha chho zel a ni.

"Season liamta erawh a hautak khawp mai, kha aia tha zawka khel tur kha ka ni asin mawle. Chutih laiin team boruaka zir hi a ni ve bawk a, tunah chuan a hma aiin kan tha tawh zawk a, hmasawnna tam tak kan team-ah hian a thleng mek, hmabak eng takin ka thlir mek a ni," tiin Hojlund chuan a sawi bawk a ni.