National Sub-Junior Boys & Girls Championship, Haryana-a neih zawh taka hmeichhe boxer pali te chuan, an coach Lalthlengliana chet dan avanga an lungawi lohna Child Welfare Committee hnenah an thlen a, FIR thehluh a ni tih Zalen.in chuan a tarlang.

National Sub-Junior Boys & Girls-a tel tur te hi hun eng emaw chen an camp a, an camp-na hmun Ramhlun Sports Complex Boxing hall-ah hian an coach chuan mawi lo tak takin a lo khawih thin. An awm te a khawih sak a, an mal te a zut sak bakah a fawp lui thin niin hmeichhe boxer pali te hian an sawi niin Zalen chuan a tarlang a ni.

Haryana an thlen thlak hnuah pawh boxer hmeichhe inbual lai te luhchilh a tum nia report a ni a, an room-a an inthlak zawh hma te pawhin luhchilh a tum bawk nia report a ni.

Child Welfare Committee chuan Protection of Children from Sexual Offences (POCSO) Act case hmangin FIR an thehlut a, Boxing coach Lalthlengliana hi July ni 8, 2025 (Thawhlehni) tlai dar 4 vel khan man nghal a ni.

Mizoram Boxing Association-in Lalthlengliana hmeichhe coach atana an ruat hrim hrim pawh hi a dik lo nia report a ni bawk a, hei vang hian Mizoram Boxing Association lakah pawh FIR thehluh duh an awm hial maithei niin Zalen chuan a thu dawn a tarlang.