Hmasawn kan la ngai - Luis Enrique

24th November 2022, 01:11PM

Spain chuan kumin an World Cup match hmasa berah 7-0 laiin Costa Rica an sawp a nih kha. Spain game a tha a, khawi position-ah pawh an tha rual, heti chung hian an coach Enrique chuan hmasawnna tur an la neih thu a la sawi cheu mai.

Costa Rica khan an khan lo hle, Spain khan ball posessions 82% lai an nei a, vawi 16 lai shots an nei bawk. Shots on target vawi 8 an neih atangin vawi 7 an ti goal. 

Tin, ball an in pass kual hnem hle, Costa Rica lamin ball vawi 230 an in pass kual laiin Spain lam kha chuan vawi 1045 lai an in pass kual hem mai. Spain tan Ferran Torres chuan goal hnih khungin Olmo, Asensio, Gavi, Soler leh Morata ten goal khat theuh an khung.

Inkhelh zawhah Spain boss Luis Enrique chuan, "Kan tum ber chu game thunun a ni a, chumi tur chuan ball kan chan hnem a ngai a ni.

"Hetianga ball kan chan hnem chuan kan khingpui te an chau thin, goal khung tuma kan nawr dan te kha ka beisei phak bak a ni a, ka player chhawr te zawng zawng an khel tha vek, hetih lai hian hmasawnna tur erawh kan la nei zel e," tiin a sawi.

Spain tana goal hmasa ber khungtu Dani Olmo chuan, "Costa Rica kha an tha lo hle niin kei chuan ka ngai lo, kan team kan that vang zawk niin ka hria.

"Kan game khelh dan atang chuan chak phu tak kan ni chiang e, team khawng tak kan nei a, tha taka kan khelh chhoh zel a ngai dawn. Hnehna kan chan avang khan inrintawkna nasa tak kan neih phah dawn bawk a ni," tiin a sawi bawk.

Group E-ah Spain chuan goal an khung hnem avangin Germany hnehtu Japan aiin an chungnung zawk. Germany leh Costa Rica te chuan point an la hlawhchhuak ve lo a ni.

Copyright © inkhel.com 2022. All rights reserved.